30 янв 2014 10:41Тоҷикистон / Бишкеку Душанбе / Тема дня

Мулоқоти Муродалӣ Алимардон бо Тоқон Мамитов дар "Ала-Арча"

Муродалӣ Алимардон, ноиби нахуствазири Тоҷикистон, дар садри як ҳайат рӯзи 30 январ ба Бишкек рафта, бо Тоқон Мамитов, ҳамтои қирғизаш, баҳси марзӣ миёни ду кишвари ҳамсояро ба баррасӣ гирифтааст. Сафари оқои Алимардон ба Бишкекро Рустам Менглиев, вазири адлияи Тоҷикистон, рӯзи панҷшанбе дар нишасти хабарии ниҳодаш тасдиқ кард ва гуфт, хулосаи худро баъд аз натиҷаи гуфтушунид хоҳанд гуфт.

Талаби роҳи мустақим аз Хоҷаи Аъло то Ворух. Ба ивази чӣ?

Гуфтушуниди Алимардон бо Мамитов баъд аз мулоқоти ҳайатҳои Тоҷикистону Қирғизистон дар Исфара сурат мегирад, ки бидуни имзои кадом санаде шоми 29 январ ба поён расид. Мақомоти Қирғизистон гуфтанд, музокироти муовинони нахуствазири ду кишвари ҳамсоя дар қароргоҳи ҳукуматӣ дар Ала-Арча баргузор шуда, ба низом овардани вазъ ва коҳиш додани нерӯҳо дар хатти марз аз мавзӯъҳои баҳси онҳост.

Оҷонси иттилооти миллии "Ховар" бо нашри хабаре гуфтааст, ба ҳайати Тоҷикистон як қатор аъзои ҳукумати Тоҷикистон, аз ҷумла роҳбарони Вазорати корҳои хориҷӣ, Вазорати умури дохилӣ ва Кумитаи давлатии идораи замин ва геодезӣ шомиланд. "Ҷониби Тоҷикистонро, ҳамчунин Котиби Шӯрои амният ва ёрдамчии президент доир ба масоили амнияти миллӣ намояндагӣ мекунанд. Зимни мулоқот ҷонибҳо масоили умдаи муносиботи дуҷониба ва роҳҳои коҳиш додани шиддатро, ки бар асари ҳодисаи марзии рӯзи 11 январи соли 2014 рухдода ба миён омадааст, баррасӣ мекунанд",-навиштааст ин Оҷонсии иттилоотӣ.

Тоҷикистону Қирғизистон тӯли 970 километр марзи муштарак доранд, ки аз он 567 километраш аломатгузорӣ шудаасту бас. Ин номуайянӣ боис мегардад, ки миёни сокинони наздимарзӣ мунтазам даргириҳо сурат гиранд. Рӯзи 11 январи соли ҷорӣ дар пайи идомаи сохмтони роҳи алтернативии Қирғизистон, ки аз қаламрави Тоҷикистон мегузарад, даргирӣ миёни марзбонҳои ду кишвар сурат гирифт, ки дар пай ҳашт захмӣ боқӣ гузошт.

Вазорати умури хориҷии Тоҷикистон бо нашри изҳороте гуфта буд, тирпаронӣ бидуни кадом огоҳӣ нахуст аз тарафи марзбонҳои қирғиз оғоз ёфта, марзбонҳои тоҷик танҳо барои ҳифзи ҷонашон ба онҳо ҷавоб додаанд. Ҷониби Қирғизистон ҳам дар ин баҳс паст наомада, марзҳояш бо Тоҷикистонро баст ва сафири худро аз Душанбе барои “мушовара” ба Бишкек хонду марзбнҳои тоҷикро дар сар задани ин ҳодиса муттаҳам кард.

Моро ҳамроҳӣ кунед:
Дар ФЕЙСБУК (FACEBOOK)
Дар ЮТЮБ (YOUTUBE)

Мӯҳр

Хабарҳои монанд: