13 янв 2014 17:54Тоҷикистон / Бишкеку Душанбе / Тема дня

Тавофуқи ахири Душанбеву Бишкек барои оромӣ дар марз

Ҳайатҳои Тоҷикистону Қирғизистон, ки ду рӯзи охир дар марзи ин ду кишвари ҳамсоя музокирот доштанд, бегоҳи 13 январ ба тавофуқ расидаанд, ки барои ба эътидол овардани вазъ нерӯҳояшонро аз деҳаҳои наздимарзӣ дуртар мебаранд. Ҷумъабой Сангинов, муовини аввали раиси вилояти Суғд, ки узви ин ҳайат аст, дар як тамоси телефонӣ бо “Озодагон” гуфт, “вазъ дар марз ором аст ва гуруҳи муштараки тафтишотӣ фаъолияти худро шурӯъ карда, тамоми маводро дар бораи тирпаронии марзбонҳои ду кишвар дар нисфирӯзи 11 январ меомӯзад.”

Ба қавли муовини аввали раиси вилояти Суғд, онҳо ба маълумоти ҳамтоёни қирғизи худ расондаанд, ки тирпаронӣ дар маҳалли Хоҷаи Аълои Исфара гузашта ва худ бозгӯи он аст, ки кӣ аввал ҳамла овардааст ва ё тир кушодааст."

Ҷумъабой Сангинов дар идома афзуд, ташкили патрулҳои муштараки Тоҷикистону Қирғизистон барои назорати марз, ки дар музокироти рӯзҳои 7 ва 9 январи соли ҷорӣ дар Душанбеву Исфара миёни ҳайатҳои ду кишвар мувофиқа шуда буд, рӯзи 15 январ ба кори худ оғоз мекунад. Оқои Сангинов мегӯяд, дар пайи тавофуқоти ахир сохтмони роҳи алтерантивии Қирғизистон дар қаламрави Тоҷикистон, ки боиси нигаронии сокинони рустоҳои наздимарзии кишвар буд, низ боздошта шудааст. Ҳарчанд расонаҳои ҚИрғизистон навиштаанд, онҳо аз сохтмони ин роҳ даст кашиданӣ нестанд.

Аз ин пештар, Шариф Қурбонов, додситони вилояти Суғд, 13 январ тайи як нишасти хабарӣ дар тирпаронии ахир дар марзи Тоҷикистону Қирғизистон сарҳадбонҳои дувумиро муттаҳам донист. Оқои Қурбонов, ки аз маҳалли ҳодиса боздид кардааст, гуфт, ҷои тирпаронӣ дар Хоҷаи Аълои Исфара буда, бе ягон баҳс замини Тоҷикистон аст ва задухӯрд баъд аз омадани қирғизҳо ба ин қаламрав ва тикушоии онҳо оғоз ёфтааст. Ба қавли додситони вилояти Суғд, ҳоло аз рӯи ду моддаи ҷиноӣ, "сӯиқасд ба ҷон" ва "убури ғайриқонунии марз" парванда боз шуда, Додситонии ҳарбӣ ё низомӣ ин қазияро таҳқиқ дорад.

Тирпаронӣ миёни марзбонҳои тоҷику қирғиз нисфирӯзи 11 январ рух дода, дар пай аз ду ҷониб ҳашт захмӣ боқӣ гузоштааст. Ба қавли мақомоти тоҷик, дар ин задухӯрд се марзбони тоҷик маҷрӯҳ шуда, ҳоло дар бемористонанд.

Дар лаҳзаҳои аввали ин тирпаронӣ мақомоти Қирғизистон ҷониби Тоҷикистонро дар шурӯи задухӯрди мусаллаҳона муттаҳам карданд. Аммо баъдан, шоми 11 январ, Вазорати умури хориҷии Тоҷикистон бо нашри изҳороте гуфт, тирпаронӣ бидуни кадом огоҳӣ нахуст аз тарафи марзбонҳои қирғиз оғоз ёфта, марзбонҳои тоҷик танҳо барои ҳифзи ҷонашон ба онҳо ҷавоб додаанд.

Мӯҳр

Хабарҳои монанд:

точик

Ба сархадбонони точики ярадор аз тарафи давлат барои мардонагию далери дар мухофизати марзи ватан мукофотхои оли ва инчунин ерии пули дода шавад. Рахмат ба волидонашон ки чунин фарзандхоро тарбия карданд. Аз сардори давлат хохишу илтимос аз фонди захиравиатон онхоро ердам кунед. Фарзандони баьзе мансабдороне ки дар кучахои Душанбе таппонча бадаст мегардед ибрат гиред чои таппончакаширо.

Ҷавоб диҳед Иқтибос Шикоят

имомудин

Офар шербачахо Худованд шуморо шифои комил дихад ва чунин гайрати шуморо ба хамаи сархадбонони точик дихад.Шумо намуна хастед.Аз хукуматдорон илтимос кахрамонии бачахоро кадр кунед!

Ҷавоб диҳед Иқтибос Шикоят

Эзоҳ илова кунед