08 янв 2014 09:37Тоҷикистон / Бишкеку Душанбе / Сиёсат

Созиши Алимардонову Мамитов дар мавриди ҳифзи якҷояи марз

Муродалӣ Алимардонов, ноиби нахуствазири Тоҷикистон, 7-уми январ бо ҳамтои қирғизаш, Токон Мамитов дар Душанбе созиш кардаанд, ки барои ҷилавгирӣ аз нооромиҳо ва таъмини тартибот дар минтақаҳои баҳсбарангези наздимарзии вилояти Суғду Бодканд патрулҳои муштарак таъсис дода шаванд.

Тибқи иттилои дафтари матбуоти Вазорати умури хориҷӣ нахуствазирҳои ду кишвар ба ниҳодҳои марзбонӣ дастур додаанд, ки 9-уми январ дар ноҳияи Исфара мулоқот намуда, масъалаи ташкили патрулҳои муштаракро аз ҳисоби марзбонҳо ва кормандони умури дохилӣ баррасӣ кунанд.

Инчунин ҷонибҳо ҷадвали мулоқотҳои комиссияи байниҳукуматии марзиро дар соли 2014 тасдиқ кардаанд. Ин даври дувуми гуфтушуниди ҳайатҳои Тоҷикистону Қирғизистон барои аломатгузории хатти марзи ду кишвари ҳамсоя, дар пайи мухолифат ва роҳбандӣ миёни сокинони Ворухи Исфара ва Оқсойи Бодканд, аст. Даври аввали он 23 декабри соли 2013 дар Бишкек баргузор шуда буд.

Он вақт Муродалӣ Алимардон, ки дар Бишкек бо Токон Мамитов сӯҳбат мекард, гуфт, ҳодисаи Ворух хусусияти иқтисодӣ дорад. “Мо ба равобити дӯстонаи суннатии мардуми тоҷику қирғиз, ки умри чандинасра дошта, барои рушди равобити ду кишвар мусоидат мекунад, арҷ мегузорем. Боварии комил дорем, ҳодисаҳои ахири марзии ду кишвар хусусияти иқтисодӣ дорад. Бояд гуфт, барои ҳалли ин ингуна масъалаҳои марзӣ ба мақомоти зирабти ду ҷониб алакай тибқи қарордодҳои болоӣ вазифаҳои мушаххас дода шудааст”,-илова карда буд ӯ.

Тоҷикистону Қирғизистон тӯли 970 километр марзи муштарак доранд, ки аз он 567 километраш аломатгузорӣ шудаасту бас. Ин номуайянӣ боис мегардад, ки миёни сокинони наздимарзӣ мунтазам даргириҳо сурат гиранд.

Мӯҳр

Хабарҳои монанд: