07 ноя 2013 23:59Тоҷикистон / Узбакистон / Сиёсат

Номаи Ислом Каримов ба Эмомалӣ Раҳмон

Пас аз эълони натиҷаҳои муқаддамотии интихоботи президентӣ дар Тоҷикистон, ки раиси ҷумҳури кунуниро ғолиб хонд, унвонии Эмомалӣ Раҳмон аз номи бархе ҳамтоҳояш барқияи шодбошӣ расидааcт.

Бино ба иттилои торнамои расмии президенти Тоҷикистон, то ин лаҳзаҳо оқои Раҳмонро бо пирӯзӣ президентҳои Русия, Афғонистон, Узбакистон, Қазоқистон, Чин ва Белорус табрик гуфтаанд. Ҳомид Карзай, раиси ҷумҳури Афғонистон ва Владимир Путин, президенти Русия дар тамосҳои телефонӣ Эмомалӣ Раҳмонро ба муносибати пирӯзӣ дар интихобот таҳният гуфта, президентҳои дигар барқияи шодбошӣ фиристодаанд.

Ислом Каримов, президенти Узбакистон дар номаи худ гуфтааст, мутмаин аст, ки фаъолияти Эмомалӣ Раҳмон дар ин мансаб дар рушду таҳкими минбаъдаи муносибатҳои Тошканду Душанбе, ки ба гуфтаи ӯ «дар асоси муштаракоти таърихӣ, ҳусни ҳамҷаворӣ, эҳтироми мутақобил ва бо назардошти манфиатҳои ду ҷониб бунёд ёфтаанд», саҳм хоҳад гузошт.

Нурсултон Назарбоев, раиси ҷумҳури Қазоқистон бошад, пирӯзии Эмомалӣ Раҳмонро нишонаи боварии баланди мардуми Тоҷикистон ба ӯ ва накшаш дар роҳи якдилӣ ва саодатмандии мардум хондааст. «Боварӣ дорам, ки фаъолияти Шумо дар ин мансаби олӣ дар самти рушд ва шукуфоии минбаъдаи Тоҷикистон саҳм хоҳад гузошт. Аминам, ки муносибатҳои бисёрҷонибаи миёни Қазоқистону Тоҷикистон, ки дар асоси анъана ва дӯстиву ҳусни эҳтироми мутақобил асос ёфтаанд, дар оянда низ ба манфиати халқҳои бародари ду кишвар рушду таҳким хоҳанд ёфт»,-омадааст дар идомаи номаи Назарбоев.

Си Ҷинпин, раиси ҷумҳурии мардумии Чин гуфта, ки «натиҷаи интихоботи президентии Тоҷикистон баёнгари он аст, ки кулли мардуми тоҷик пуштибони сиёсати дохилӣ ва хориҷии Шумост». Дар барқияи Си Ҷинпин аз ҷумла гуфта мешавад: «Аминам, ки таҳти роҳбарии Шумо дар роҳи таҳкими давлат Тоҷикистон ба дастовардҳои афзунтаре ноил мегардад. Имсол аввалин соли ба роҳ мондани ҳамориҳои стратегӣ миёни Чину Тоҷикистон мебошад. Аз ин рӯ, барои рушди муносибатҳои дуҷониба имконоти беназире пайдо гирдиданд. Ман омодаам, ки бо Шумо барои равнақи ҳамкориҳои муҳими стратегии Чину Тоҷикистон, ки ба нафъи кишвар ва халқҳоямон мебошанд, талош варзам».

Александр Лукашенко, президенти Белорус дар номаи табрикии худ унвонии Эмомалӣ Раҳмон навишта, ки «халқи тоҷик бори дигар ба Шумо ҳамчун ходими намоёни давлатӣ боварии худро изҳор намуда, ҷонибдорӣ аз сиёсати ҷорӣ намудаи Шуморо, ки ба таҳкими истиқлолияти Тоҷикистон ва таъмини рушди устувори иҷтимоию иқтисодӣ,баланд бардоштани некӯаҳволии шаҳрвандон равона шудааст, тасдиқ кард. Бо изҳори қаноатмандӣ сатҳи баланди ҳамгироии байни кишварҳоямон, характери фаъоли ҳамкориҳои дуҷонибаро зикр менамоям ва боварӣ дорам, ки минбаъд дар рӯҳияи созанда ҳамкориҳои дуҷонибаамон рушд меёбанд».

Интихоботи президентӣ дар Тоҷикистон 6-уми ноябр баргузор шуда, тибқи иттилои Комиссияи марказии интихобот ва раъйпурсии кишвар, ки натиҷаҳои муқаддамотии онро эълон кард, Эмомалӣ Раҳмон бо касби беш аз 83 дар сади оро барои ҳафт соли дигар раиси ҷумҳур интихоб шуд.

Мӯҳр

Хабарҳои монанд: