Ҳадафи террористон интихоботи президентии Тоҷикистон буд?

Мақомоти қудратии Тоҷикистон “як гурӯҳи муташаккили мусаллаҳи террористӣ”-ро боздошт кардаанд, ки қасди ҳамла ба Душанберо доштаанд.

Ба қавли онҳо, ин гуруҳ марбут ба Созмони террористии “Ал-Қоида” буда, зери раҳбарии Алламурод Маханов, яке аз парвардаҳои мактаби “террористӣ”-и Покистон ба қаламрави Тоҷикистон ворид шудааст. “Ӯ аз тарафи ин созмон ба хотири анҷоми як чанд ҳамлаи хунин дар арафаи интихоботи президентӣ ба Тоҷикистон сафарбар шуда буд”,-гуфтааст як манбаи мақомоти қудратӣ ба “Интерфакс”.

Дар ҳамин ҳол, масъулони Вазорати умури дохилии Тоҷикистон бо сабабҳои номаълум аз ифшои ҷузъиёти ин ҳодиса худдорӣ карда, мегӯянд, дар ин бора барномаи махсуси телевизионӣ шоми 23-уми сентябр аз тариқи Шабакаи аввали Тоҷикистон пахш хоҳад шуд. Бинобар ин, то ҳол тавзеҳоти бештар дар бораи теъдоди афроди гуруҳ, шахсияти онҳо ва чикораву аз куҷо будани онҳо номаълум аст.

Ҳоло боздоштшудагон дар боздоштгоҳи муваққатии Шизои Душанбе нигоҳ дошта мешаванд. Як манбаи мо дар Вазорати умури дохилӣ мегӯяд, ҳангоми боздошт аз ин гуруҳи террористӣ миқдори зиёди аслиҳа ва камарбанди интиҳорӣ ёфт шудааст. Кормандони мақомти қудратии тоҷик мегӯянд, аз рӯи ин ҳодиса парвандаи ҷиноӣ боз шудааст.

Акс аз Интернет Мӯҳр