16 сен 2013 16:18Тоҷикистон / Қазияи Зайд Саидов / Сиёсат

Зайд Саидов гуфтааст, 100% бегуноҳ аст ва дар ягон ҷинояте даст надорад

Зайд Саидов, раҳбари боздоштшудаи гурӯҳи ташаббускори таъсиси Ҳизби “Тоҷикистони нав”, дар рӯзи севуми мурофиаи додгоҳияш аз вазъи саломатии худ изҳори қаноатмандӣ кардааст. Ӯ гуфта, ки дар муқоиса ба рӯзҳои аввал ба ваъзи нигаҳдорӣ дар боздоштгоҳ мутобиқ шудааст ва ҳоло тамоми талошаш бар ин аст, ки мурофиа хуб бигузарад.

Шӯҳрат Қудратов, яке аз се вакили мудофеи оқои Саидов, ки баъд аз анҷоми мурофиаи ҳафтсоата бо “Озодагон” сӯҳбат мекард, гуфт, рӯзи душанбе 8 моддаи марбут ба парвандаи нафари таҳти ҳимояташ баррасӣ гардида, Зайд Саидов тамоми иттиҳомотро рад кардааст: “Зайд Саидов сад дарсад тамоми иттиҳомро рад карда гуфт, дар ҳеч яке аз ин ҷиноёт даст надорад. Номбурда дар ин мурофиа низ натиҷаи ташхиси ДНК-ро рад кард. Аз ин хотир, мо аз додгоҳ талаб хоҳем кард, то ташхиси ДНК аз нав гузаронида шавад”,-гуфт Шӯҳрат Қудратов.

Дар ҳамин ҳол, Исҳоқ Табаров, яке дигар аз вакилони мудофеи Зайд Саидов мегӯяд, онҳо барои исботи бегуноҳии нафари таҳти ҳимояташон далелҳои қотеъ доранд, ки дар ҳолатҳои зарурӣ истифода хоҳанд кард. “Мо аз додраси парванда дархост кардем, то ҷабрдидагон -Окушев, Коретский, Витриченко, Сурков ва ҳамчунин духтари таҷовузшуда низ барои бозпурсӣ даъват карда шаванд",-гуфт Исҳоқ Табаров.

Шӯҳрат Қудратов мегӯяд, аммо дархости онҳо аз тарафи додгоҳ дар мавриди қисман ба таври боз сурат гирифтани парванда рад карда шуд. Ӯ мегӯяд, аз сабаби махфӣ будани парванда ҷузъиёти бештари онро ошкор карда наметавонанд. Дар ҷавоб ба саволи хабарнигорон, ки мурофиаи додгоҳӣ то ба кай идома хоҳад кард, номбурда гуфт: “Дар ин парванда 6 ҷабрдида ва ҳамзамон шоҳидон низ бояд бозпурсӣ шаванд. Эҳтимол дар парвандаи мазкур ҳудуди 25 кас пурсида шавад. Идомаёбии парванда аз он вобаста аст, ки додрас чӣ қадар зуд онҳоро пайдо карда метавонад”,-гуфт Қудратов.

Мурофиаи додгоҳии Зайд Саидов, раҳбари боздоштшудаи гуруҳи ташаббускори таъсиси Ҳизби Тоҷикистони нав 12-уми сентябри соли ҷорӣ дар боздоштгоҳи муваққати Кумитаи амнияти миллӣ оғоз ёфт. Танҳо рӯзи 16-уми сентябр Хайрулло Саидов ва Файзиддин Шеров, писар ва бародари Зайд Саидов барои иштирок дар мурофиаи додгоҳии ӯ иҷоза дарёфт карданд.

Мӯҳр

Хабарҳои монанд: