19 июл 2013 11:17Тоҷикистон / Фарҳангу адаб

Мадҳу санои Эмомалӣ Раҳмон дар таронаи овозхонҳои тоҷик

Маҳбуби ГАНҶААЛӢ

Дар мавриди маддоҳони шоҳон аз таърих зиёд хондаем. Шоирони дарборӣ ба ҷуз аз васфи подшоҳ ва тақдими байту ғазалу қасида ва достонҳо гӯиё кори дигаре надоштаанд.

Бахше аз он тавсифномаҳо то замони мо ҳам расидаву ҳифз шудаанд. Мутаассифона фиттаву CD ва DVD набуд, то бишнавему бубинем, ки оё сарояндаҳо дар васфи шоҳ чӣ таронаҳое мехонданд. Аммо мо ин ифтихорро дорем, ки барои наслҳои оянда дарза-дарза кассетаву дискҳоро бо таронаҳое дар ситоиши президент ба мерос бигзорем.

Дар таронаҳои тоҷикӣ президент шоҳ хитоб мешавад. Ӯро баъзан имому пешво ҳам мегӯянд...

Ин ҷо танҳо чанд таронаро мисол мезанем ва мутмаинем, Шумо низ тариқи телевизионҳои давлатӣ аз чунин сурудҳо зиёд шунида ва дидаед. Аз клипҳо бо ширкати раисиҷумҳур зиёд гуфтаанд ва мо ба ин мавзӯъ дахл нахоҳем кард. Ҳарчанд дар арафаи интихоботи президентӣ шумори чунин тарона ва клипҳо ба маротиб афзоиш ёфтааст.

Бештари таронаҳои тавсифӣ дар авҷи бунёди сохтмони “Роғун” тавлид шудаанд. Он замон фазои шоу бизнес “роғунистон” шуд. Бештари сарояндаҳо таронаи “Роғун” мехонданд ва ин сурудҳоро кормандони ТВ бо навори президент орову торо дода, дар эфир пахш мекарданд. Ба шарофати “Роғун” орзуи чанд сароянда ҷомаи амал пӯшид ва сурудаш аз тариқи ТВ пахш шуд. Таври маълум матнависон дар бисёре аз шеърҳои худ президентро васф мекарданд, ки маҳз ба шарофати ӯ Роғун сохта мешавад.

Исроил Файзиддинов, як овозхони таронаҳои мардумӣ дар суруди «Роғун» мехонад,

“Бар давлати раҳмонӣ аҳлона камар бастем,
Аз давлати раҳмонӣ дилшоду дигар ҳастем
Бунёди ту, эй Роғун, бунёди ватандорист,
Аз неъмати раҳмонӣ, озод зи хатар ҳастем.”

Гуруҳи «Ҳамроз» дар таронаи маъруфи «Номуси ватандорӣ» мехонад:

“Бархез ба сар кун ҳамватан тоҷи каёнро,
Бархез дифоъ кун, ин хоку заминро.
Баъд аз ҳазор сол саҷда намудӣ,
Додаст Худованд барот тоҷу тавонро.”
(Шояд мегӯед, дар ин тарона ба ҳамаи ҳамватанҳо ишора шудааст, аммо вақте клипи онро тамошо мекунед, маълум мешавад, ба кӣ хитоб мешавад, ки “тоҷи каён”-ро ба сар гузорад. Гузашта аз ин шоирони мо “дифоъкунандаи замин” гуфта танҳо ба президент хитоб мекунанд)

Шаҳроми Абубакр, овозхони поп ҳам дар як тарона «Шукрона мекунам ман ба аҳди сарвари хеш» мехонад. Дар репертуари Хосияти Зарафшонӣ, Миралӣ Достиев ва Ансамбли “Ориё” ҳам чунин сурудҳоро мешавад пайдо кард.

Худобиёмурз Зафар Нозим ҳам дар таронаи “Ҷонам ватанам” чунин мисраъҳоеро замзама кардааст:

“Ҷонам ватанам гавҳари покизанишонӣ,
Бо сарвари некахтари хеш вирди забонӣ.

Бо сарвари фарзона ҳама рӯ ба ниёем,
Дур аз амали фаслгаҳи макру риёем,
Озодиву озодагии мост муқаддас,
Аз қавми суханпеша яке аҳли зиёем.”

Таронаи дигари Зафар Нозим ҳамон маъруф ба “Эй сарвари ман” аст, ки баъдан аз сӯи фарзанди бузургаш - Ҷовидон Нозимов бозхонӣ шуд.

Амрихудо дар суруди “Тоҷикистон” мехонад, ки:

“Тоҷикистон нурборон шуд дигар чашми нами ту,
Шаҳсаворе кард эҷодат зи ҳар бешу ками ту.”

Афзалшоҳи Шодӣ бошад, дар як таронааш президентро имоми миллат мегӯяд:

“Зиндаву поянда бодо, халқи мо бо сарвараш,
Тоҷикистон каъбаи мо, ӯ имоми миллат аст.”

Пас аз он ки аз тариқи шабакаи “К+”-и Қазоқистон навори тӯйи писари Эмомалӣ Раҳмон намоиш дода шуд, дар интернет суруди наве ба сайр даромад. Дар навори видеоие, ки пораҳое аз рақси президент дар тӯйи Рустамро намоиш медиҳад, суруди “Шоҳи мо омаде, подшоҳи мо омаде” садо медиҳад. Он аз тавсиф дида, ба киноя наздикӣ дорад. Бархеҳо мегӯянд, ин тарона махсус ва барои ҳамин навор таҳия шудааст. То кунун маълум нест, хонандаи он кист.

Дар баробари ҳамаи ин дар интернет ягон-ягон таронаҳои зидди Эмомалӣ Раҳмон низ мавҷуданд, ки аз сӯи хонандаҳои рэп суруда шудаанд.

Мӯҳр

Хабарҳои монанд:

Дарвеш

Калимаи Шох ё Подшох дар кишвархое,ки дар ончо,тибки Сарконун рохбари мамлакат, Президент ном бурда мешавад, истифода бурдан дар вакти нутк кардан,чоиз нест. Президенте,ки тибки Сарконун ,аз тарафи кулли мардум дар интихоботи шаффофу демократи интихоб карда мешавад.,бояд нагузорад,ки уро Шох ё Подшох ном бубаранд,чун,ки ин мукобили Сарконун мебошад. Таърифу тавсифи бисёр хам нисбати Рохбарон ун кадар хуб нест, дар онхо худкомагиро ба вучуд меоварад. Ба
хамааш мардум дар оянда бахо хоханд дод.

Ҷавоб диҳед Иқтибос Шикоят

Vatandust

Дар мамлакати мо ин корхо муд (мода) шудааст.

Ҷавоб диҳед Иқтибос Шикоят

донишчу

хайр хеч гап не мардуми бадахшон алохазрат огохони чорро эмоми замон этироф мекунанд. мардуми дангара хазратшона.

Ҷавоб диҳед Иқтибос Шикоят

Rustam Rustamov

КАНЕЧНО ВАЗИФАДОРАНД, КИ МАХДУ САНОЯШ ХОНАНД БАРОИ ОНЕ, КИ ВАТАНАМОНРО ШУКРОНИЗАЦИЯ КАРД. ОБОДИ НЕСТ БАРОИ ВАЙРОНИ ШУКР ГУЕД..
АСЛАН КАЛИМАХОИ "САНО ВА МАХД" ИН ХОСИ ХУДОВАНДАНД Ч, Ч..... ЧАРО БАРОИ КАСЕ, КИ ХЕЧ ОБОДИ НАКАРДААСТ ИСТИФОДА МЕБАРАНД....

Ҷавоб диҳед Иқтибос Шикоят

hisor

Rustam Rustamov,
baroe ki tu kur shudai namebini obodiro. yo dar vatanat nesti.

Ҷавоб диҳед Иқтибос Шикоят

Эзоҳ илова кунед