28 июн 2013 16:11Қазоқистон / Тоҷикистон

Қаср барои 10 ҳазор хонанда дар пойтахт (АКС)

Нилуфари КАРИМ

Қасри мактаббачагони шаҳри Остона зиёда аз 20 хабарнигори Осиёи Миёнаро, ки дар доираи барномаи «Баланд бардоштани маълумотнокии экологӣ барои тақвият бахшидани ҳамкориҳо миёни Иттиҳоди Аврупо ва Осиёи Марказӣ», дар Қазоқистон ҳузур доранд, ба худ ҷалб кард.

Дар суҳбат ба «Озодагон» Умсин Аркабаева, роҳбари қасри мазкур гуфт, ки Қасри мактаббачагони шаҳри Остона сохтори нави таҷрибавии омузишӣ ва тарбиявӣ буда, ба тадқиқот, таҳия ва қабули барномаҳои муосири таълимӣ, ҷорӣ кардани технология ва методикаҳои нави таълимӣ бо назардошти талаботи донишкадаҳои замонавӣ сафарбар шудааст.
Касри мазкур аз моҳи апрели соли 2012 фаъолият мекунад. Айни ҳол дар он 137 шӯъбаҳои гуногун дар 14 самт зиёда аз 10 ҳазор мактаббачагонро ба таълим ва тарбияи иловагӣ фаро гирифтааст. Мавриди зикр аст, ки масоҳати Қаср 61 274, 6 метри мукаабро ташкил дода он аз 4 қабат, 842 синфхонаву утоқҳо иборат мебошад.

«Хадафи аслии таъсиси Касри мактаббачагон рушди маҳорат ва имкониятҳои эҷодӣ, илмиву таълимии насли наврас мебошад. Дар қасри мактаббачагон Планетария бо манзараҳои кайҳонӣ дар инъикоси имкониятҳои 3D , обсерватория бо толори консертӣ барои 300 нафар, театри драмавӣ барои 500 нафар, маркази интернетӣ, маркази матбуотӣ, боғи зимистона, толор барои гузаронидани форумҳо, мубоҳисаҳо, театри хурди кудакона, толорҳои варзишӣ барои бозии баскетбол, варзиши сабук, гуштингирӣ теннис, толорҳо барои машғӯлияти санъати миллӣ ва рақси муосир, студияҳои сабт, майдони яхмолакбозӣ ва ҳавзи оббозӣ муҷаҳҳаз гардонида шудааст»-афзуд Умсин Аркабаева .

Самти асосии фаъолияти қасри мактаббачагон ба додани маълумоти иловагӣ оид ба математика, химия, биология, экология, биотехнология, генная инженерия ва физика равона шудааст. Бояд гуфт, ки дар Қасри мазкур олимон, мутахасисони шинохтаи қазоқ, ходимони хизматнишондаи илм, фарҳанг ва варзиши Қазоқистон ба таълим ва тарбияи мактаббачагон машғуланд. Аз ҷумла 6 нафар доктори илм ва профессорон, 5 нафар номзади илми маркази кайҳоншиносӣ, 2 нафар аъзои иттифоқи эҷодии Федератсияи Русия, 5 нафар узви иттифоқи рассомон, 4 нафар ходимони хизматнишондодаи Қазоқистон, 9 нафар қаҳрамон ва 12 нафар устодони варзиш нозукиҳои касби худро меомӯзонанд.