30 май 2013 11:41Оcиёи Марказӣ / Қирғизистон

Гирдиҳамоии пайвандони Равшан Собиров дар Бишкек

Ҳудуди 20 тан аз пайвандон ва дӯстони Равшан Собиров, вазири собиқи рушди иҷтимоӣ ва раҳбари ҷамъияти тоҷикони Қирғизистон, дар назди Кохи сафеди Бишкек таҷаммӯъ кардаанд.

Сa-news бо нақл аз Батма Сабирова, хоҳари Равшан Собиров навиштааст, ки онҳо тақозо доранд, комиссияи баррасии парвандаи ӯ аз нав таъсис шавад. «Мо бар инем, ки қарори додгоҳ одилона содир нашудааст. Агар мо қаблан ин митингро ба нақша мегирифтем, теъдоди зиёде аз одамон ҷамъ мешуданд. Шоми дирӯз ба мо хабар оварданд, ки вазъи саломатии Равшан бад шудааст. Аз ин рӯ мо ҷамъ шудем», - гуфтааст вай.

Қаблан, хабар расид, ки Равшан Собиров дар эътироз ба ҳукми ахири Додгоҳии олии Қирғизистон даст ба гуруснанишинӣ задаст.

Анорхон Собирова, модари собиқ вазир ҳам гуфта, ба қарори додгоҳ розӣ нест: «Ман 11 фарзанд ба воя расондам ва ҳамаи онҳо тарбияи хуб гирифтаанд. Ҳеч кадоми онҳо пули одами бегонаро намегиранд, Равшан ҳам ҳамчунин».

Ахиран, Додгоҳи олии Қирғизистон ҳукми Додгоҳи шаҳри Бишкекро дар бораи Равшан Собиров, вазири пешини рушди иҷтимоӣ ва раҳбари ҷамъияти тоҷикони ин кишвар, бетағир боқӣ гузошт. Ҳафтуми марти соли 2013 Додгоҳи шаҳри Бишкек мурофиаи Равшан Собировро ба поён бурда, ӯро ба панҷ соли зиндон маҳкум кард. Ин додгоҳ ҳамчунин гуфта буд, тамоми амволи Собиров бояд мусодира гардад.

Равшан Собиров ба он айбдор шудааст, ки дар замони вазири рушди иҷтимоии ин кишвар буданаш гӯиё ба ришвахӯрӣ даст задааст. Парванда алайҳи ӯ бо нишондоди собиқ ёвараш, Тоҳир Мирзоаҳмадов оғоз гардид, ки 4-уми июли соли 2012, зимни гирифтани ришва аз як ширкати итолиёвӣ дастгир шуд. Ӯ изҳор доштааст, ки маблағро бо дастури Собиров гирифтааст, вале баъдан эътирофоташро ба манфиати Равшан Собиров тағир дода буд.

Равшан Собиров, ки моҳи декабри соли 2011 вазири рушди иҷтимоии Қирғизистон таъин гардид, моҳи июли соли 2012 дар робита ба иттиҳомот дар фасодкорӣ муваққатан аз ин мансаб барканор гардид. Ӯ панҷуми июли соли 2012 боздошт ва ба боздоштгоҳи Кумитаи амнияти миллии Қирғизистон интиқол ёфт. Додгоҳи ноҳияи Первомайски Бишкек, Собировро моҳи ноябри соли 2012 «сафед» эълон кард. Аммо додситонии кулли Қирғизистон парвандаи Собировро аз нав ба баррасӣ гирифта, ба додгоҳ ирсол намуд, ки бо панҷ сол ҳукми зиндон ва мусодираи амволаш поён ёфт.

Мӯҳр

Хабарҳои монанд: