04 апр 2014 10:25Тоҷикистон / Иқтисодӣ

7 назар: Аз ҷаримабандиҳои “Шаҳри бехатар” розиед?

Дар пасманзари сарусадо оиди гаронии ҷаримабандӣ тариқи лоиҳаи "Шаҳри бехатар", аз ҷумла 48 000 сомонӣ ҷарима шудани як ронанда дар Душанбе "Озодагон" аз сокинони пойтахт суол кард, ки оё аз ин низом розиянд?

Икром Бозоров, ронандаи таксӣ

Ҷаримаҳои камераҳо аслан мувофиқ нестанд. Як муштарӣ саросема аст ё ягон бемор дорад, 20 сомонӣ медиҳаду то Хонаи матбуот мебаред, дар роҳ яке чароғи сурхро мегузаред, хуб агар ҷаримааш 30 ё 50 сомонӣ мебуд, ҳеч гапе намебуд, вале 200 сомонӣ ҷарима меояд, ки ин бо ҳеч чорчўб мувофиқ намеояд. Дар Русия мо чароғи сурхро гузаштем, ҷаримааш 150 суми русист. Агар ҷаримаҳо арзонтар мебуданд, хубтар мешуд. Ҷуз ин андози зиёд месупорем, вале на роҳ обод мешаваду на пайроҳа.

Қутбиддин Мухторӣ, устоди ДМТ

Ман як маротиба барои зер кардани хатти уфуқии пиёдагард, ба маблағи 40 сомонӣ ҷарима супоридам. Қаблан дар як мақола хондам, ки маошҳои ҳадди ақал то чи андоза бо ин ҷаримаҳо мутобиқат мекунад. Агар чанд бор хато кунед ҷаримаатон ба ҳамон андоза чанд баробар мешавад. Аз як тараф агар ҷаримаҳо аз ҳадд паст бошанд, як тоифа мардуме ҳастанд, ки инро писанд намекунанд. Аз тарафи дигар ҳамин гуруҳи одамон шумораи камтарини ронандагонро ташкил мекунанд ва ба хотири қонуншиканиҳои ҳамин гуруҳ дигар ронандагон ҷабр мебинанд. Супоридани ин ҷаримаҳо барои бархе одамон ба хусус барои ронандагони таксӣ, ки дар як рӯз мумкин то 40 сомонӣ кор кунанд, бисёр мушкил аст. Ҷаримаҳо воқеъан бисёр гарон ҳастанд. Дар инҷо бояд фарҳанги ронандагӣ бошад, ки шумо аввалан хато накунеду баъд барқасд хилоф накунед, аз ҷониби дигар тасодуф ҳам кардед, ба кисаи шумо онқадар зарари ҷиддӣ наоварад. Ҳатто гоҳо мешунавем, ки аз арзиши мошин ҳам ҷаримаҳо зиёд шудаанд. Агар ин камераҳо ба мақсади ислоҳи кор ва баланд бардоштани фарҳанги ронандагӣ ва шаҳрдорӣ бошад, бояд як маротиба аз тариқи барномаҳои телевизионӣ тавассути як корманди БДА, ки таҷрубаи калон дорад ба мардум мефаҳмониданд. Гоҳо мешавад, ки хато кардан ё накардани шумо ташхисаш душвор мешавад, масалан дар бисёрҷоҳо дар назди чароғи роҳнамо хати уфуқӣ, ки бояд онро пахш накардаву аз он нагузаред, вуҷуд надорад. Ин хатҳо дар ҷойҳои дигар хира ё ки беранг шудаанд, инҳо ҳам боиси ҷарима шудани ронанда шуда метавонад. Агар қабл аз шинонидани камераҳо ташкили қоидаҳои қисмати роҳравӣ омода мешуданд, дар ин ҳолат розӣ шудан мумкин буд, ки ҷаримаи хато карданҳоро бипардозем. Гузашта аз ин на танҳо ҷарима, балки бисёр намуди дигари андозҳо ҳам ҳастанд, ки барои мардуми мо гаронӣ мекунанд. Агар ҳамин хел андозҳо боло рафтан гирад, намедонем дар ин шаҳр баъд кӣ зиндагӣ мекарда бошад.

Ҷалолиддини Сайидҷалол, ронанда

Вақте қонуншиканӣ кардӣ, дигар чорае ҷуз пардохти ҷаримаи он боқӣ намемонад. Ҳар кас намехоҳад ҷарима супорад, аз рӯи қонун кор кунад. Албатта бо пардохти ҷарима болои мо зӯр меояд, лекин аз ин ба баъд дигар қонунро риоя мекунед.

Ҷамила Мақсудова, журналист

Дар ҳамон бахши санҷиш 1 нафар кор мекунад ва барои як нафар қариб 40-50 дақиқа сарф мешавад, аввал аз рӯи компютер месанҷад ва бовар намекунад, ки ту ҷарима надорӣ, сипас аз рӯи протоколҳо, боз бовар накарда ба ҳуҷҷатҳои пардохтшуда мегузарад, ки баногоҳ ҷарима дошта бошиву пардохт накардӣ бошӣ. Дар маҷмуъ ҷаримаҳои камераҳо зиёданд. Агар бори аввал қоида вайрон кардед, 40 сомонӣ месупоред, бори дуюм ҳамон далел аммо алакай 80 сомонӣ мешавад, гузаштан ба чароғаки сурх аз 120 то 240 сомонӣ аст ва ин ба инсофи ҳамон корманди БДА вобаста аст. Агар дар як рӯз 3 бор қоидашиканӣ кардед, 120 сомонӣ месупоред.

Нозанин Собирова, ронанда

Пештар дар истгоҳ истодан метарсидем, аммо бо пайдоиши камераҳо дар роҳҳо низом ба вуҷуд омадааст. Вале нархи ҷаримаҳои он нисбатан баланд мебошад. Ин бо вазъияти мо мувофиқ нест, пардохти ҷаримаи зиёд намеарзад. Агар ақаллан роҳҳо ҳамвор мебуданд, мешуд, вале охир бо ин роҳҳои хароб фармони мошинро ба он тараф чархониданӣ бошед, дар чола меафтед. Хуб мешуд, ки хизматрасонӣ ҳам ҳамроҳи ҷаримаҳои камераҳо беҳбуд меёфт.

Нуриддин Қаршибоев, раҳбари НАНСМИТ

То ҳол ҷарима наовардаанд, вале, то ҷое хабар дорам, вақте ба ГАИ корафтода мешавед, ҷаримаҳоро меситонанд, агар не, мушкилатон ҳалли худро намеёбад. Ба назари ман, аслан Душанбе барои амалӣ кардани чунин лоиҳа омода нест, зеро роҳҳояш ба стандарту талабот ҷавоб намедиҳанд. Бубинед, дар чорраҳа барои насби камераҳо роҳро мекананд, вале пас аз анҷоми кор, онро таъмир намекунанд. Худи ҳамон чуқурҳо боиси маҷбуран вайрон кардани қоидаҳои ҳаракат мешаванд.

Абдулмалик Қодиров, коршинос

Ростӣ, ман алҳол бо ин ҷаримаҳо рў ба рў нашудаам, вале аз он чи шунидам, низоми ҷаримабандӣ хеле ношаффоф аст, ки сабаби ришвахорӣ мегардад. Ҳамчунин бо назардошти сатҳи маоши кормандони буҷавӣ ин ҷаримаҳо хеле баланд аст.

Мӯҳр

Хабарҳои монанд:

Sino

Самандар,
Агар дар Точикистон хам фасодкоронро ба катл расонанд, ягон мансабдор намемонад!!!

Ҷавоб диҳед Иқтибос Шикоят

Sino

Шахрванд,
Ин "шахри бехатар" махсус барои макидани хуни камбагал аст! Пас ба ин"шахри бехатар" умед набандед!!! Номаш бехатар дарун пур аз хатар аст!!!

Ҷавоб диҳед Иқтибос Шикоят

Sino

Рустам,
Бародари азиз ба ки мурочиат кунем ва аз болои ки шикоят кунем???Ба кучое мурочиат е аз болои касе шикоят набарихам худ гунахкор мебарои!! Зеро хама тагаю тагобачахоян хешу таборан!! Агар ман аз болои чияни Шумо шикоят кунам, ягон чора медида бошед??!!! Пас ба доди мардуми бечора ки мерасад!!!!

Ҷавоб диҳед Иқтибос Шикоят

Латипов Зёдулло

Ман мехохам ки Чаримахоро сабуктар кунанд

Ҷавоб диҳед Иқтибос Шикоят

Эзоҳ илова кунед