19 дек 2013 12:09Тоҷикистон / Иҷтимоӣ / Минбари Шумо

Вокуниши ҳукумати Хуҷанд ба сӯҳбати Илҳомҷон Ёқубов

Ҳукумати шаҳри Хуҷанд бо ирсоли номае унвонии “Озодагон” ба як бахши сӯҳбати Илҳомҷон Ёқубов, раиси дафтари Ҳизби наҳзати исломӣ дар вилояти Суғд, эрод гирифтааст. Оқои Ёқубов рӯзи 17 декабр, дар пайи кумак ба 1000 ятим ва оилаҳои ниёзманди вилоят, ба “Озодагон” гуфта буд, Марҳабо Қазоқова -- сокини шаҳри Хуҷанд агарчӣ аз ҳукумати Хуҷанд кумак хостааст, вале ёрӣ нагирифтааст.

“Аз панҷ оилае, ки шахсан он ҷо будам, гуфтанд, ки аз ҷониби ҳукумат, созмонҳои иҷтимоӣ ва вакилони маҳаллӣ кумак мегиранд. Аммо Марҳабо Қазоқова, ки дар маҳаллаи 20-уми шаҳри Хуҷанд зиндагӣ мекардаасту фарзанди маъюб дорад, гуфт, чанд бор ба ҳукумати Хуҷанд муроҷиат намуд, то ки барояш кумак расонанд, вале аз ҷониби онҳо посухи рад гирифтааст”,-гуфта буд Илҳомҷон Ёқубов.

Вале Маҳмудҷон Додобоев, масъули дафтари матбуоти ҳукумати Хуҷанд менависад, “ба маълумоти Шумо мерасонем, ки мутаасифона ин далел тасдиқи худро наёфт. Баъд аз равшанӣ андохтан ба ин масъала шаҳрванд Қазоқова иброз намуд, ки баъд аз муроҷиат ба ӯ кумак расонда шудааст.” "Баъд аз суҳбат бо модари Марҳабо Қазоқова – Собира Қазоқова маълум гашт, ки бобати фарзандаш, ки маъюб аст, ба Мақомоти иҷроияи ҳокимияти давлатии шаҳри Хуҷанд муроҷиат намуда, фарзандаш соҳиби аробачаии маъюбӣ шудааст. Собира Қазоқова баён намуд, ки суханонаш дар бораи радди муроҷиат дар холати ҳаяҷон гуфта шуда буданд",-таъкид шудааст дар нома.

Дар замимаи ин нома як мактуб аз номи Собира Қазоқова ҳам ҷо дода шудааст. Хонум Қозоқова дар ин мактуби худ гуфтааст, аз тарафи ҳукумати шаҳри Хуҷанд аробаи маъюбӣ дастрас карда, инчунин, мақомот дар пардохти пули истифода аз нерӯи барқаш кумак мекунанд. Вай дар охири ин мактубаш, ки 17 декабр навишта шудааст, барои ин ҳама ба ҳукумати Хуҷанд изҳори сипос намудааст.

Мӯҳр

Хабарҳои монанд: