Кӯлоб: Ҳалокати чор нафар бар асари бемории сил

Бино ба иттилои расмӣ, теъдоди гирифторони бемории сил дар ноҳияи Темурмалик рӯ ба коҳиш меорад.

Хайриддин Файзиддинов, менеҷери беморхонаи сили ноҳияи Темурмалик ба ин андеша аст, ки гирифторони бемории сил дар соли 2012-ум дар нисбат ба солҳои қаблӣ дар ҳудуди ноҳия кам шудаанд. Тибқи иттилои ӯ, соли 2010-ум мубталоёни ин беморӣ 89 нафар, 2011-ум 101-нафар ва соли гузашта 77-нафар расман ба қайд гирифта шудаанд.

Аз шумораи  силзадагон дар соли 2012-ум, 64-нафарашон барои нахустин маротиба гирифтори ин маризӣ гаштаанд. Инчунин, 6 тани дигар дорои сили мутобиқгашта будаанд, ки барои муолиҷа ба беморхонаи зиди касалиҳои сили вилоятӣ дар шаҳри Кӯлоб, интиқол ёфтаанд, аммо 4 каси дигар бо иллати ҳамин беморӣ фавтидаанд.

Тибқи иттилоъи ғайрирасмӣ шумораи силзадагон дар ноҳияи Темурмалик ба маротиб зиёд аст, аммо дар мавриди ошкор намудани онҳо масъулин бечораанд.

Ҷаноби Файзиддинов мегӯяд, сабаби асосии кашф нагаштани беморони сил, ин набуди таҷҳизоти нави рентгенӣ мебошад. Ба гуфтаи ӯ, ҳанӯз дар ноҳия усули аксбардории флюорографӣ роҳандозӣ мебошад, ки бо айби набудани пленкаҳои аксгирӣ, ин таҷҳизоти қадимӣ умуман мавриди истифода нест.   Мӯҳр