16 дек 2016 09:25Хабарҳои ҷаҳон / Сиёсат / Тема дня

Путин, Трамп, Усмонов, Бағдодӣ... Чеҳраҳои таъсиргузори соли 2016

Маҷаллаи маъруфи “Форбс” чеҳраҳои таъсиргузори 2016-ро муайян кардааст.

Дар садри ин феҳрист, ки номи 74 нафарро дар бар мегирад, Владимир Путин, раисҷумҳури Русия нишастааст. “Форбс” дар бораи Владимир Путин навиштааст: “Раисҷумҳури Русия, ки 4 сол қудратмандии худро нигоҳ доштааст, таъсири кишвари худро тақрибан дар тамоми нуқоти ҷаҳон нишон дод. Путин аз кишвари худ то Сурия ва интихоботи Амрико ба ҳар чизе ки мехоҳад даст меёбад. Соли 2016 рахнагарони Русия барои ворид шудан ба имейлҳои аъзои Ҳизби демократ ва кумак ба корзори интихоботии Доналд Трамп, ки ҳамеша шеваи раҳбарии Путинро ситоиш мекунад, мутаҳҳам шуданд”.

Ин бори чорум аст, ки Путин дар феҳрасти чеҳраҳои таъсиргузори ҷаҳон мақоми аввалро касб мекунад. Дар мақоми дуввум имсол Доналд Трамп, раисҷумҳури тозаинтихоби Амрико нишастааст. Ангела Меркел, садри аъзами Олмон, Сӣ Ҷин Пин, раисҷумҳури Чин, Поп Франсис, раҳбари католикҳои ҷаҳон низ вориди панҷгона шудаанд.

Маҷаллаи “Форбс” имсол 11 чеҳраи навро вориди феҳристи қудратмандони соли 2016 кардааст, ки миёнашон Тереза Мей, нахуствазири Бритониё, Травис Каланик, мудири аршади иҷроияи ширкати Убер, Майк Пенс, муовини Доналд Трамп, Антонио Гутереш, дабири тозатаъйини Созмони миллали мутаҳҳид ҳастанд.

Али Хоманаӣ, раҳбари Ҷумҳурии Исломии Эрон мақоми 18-уми ин феҳристро аз они худ кардааст. Алишер Усмонов, сарватманди узбактабори Русия дар ин феҳрист 58-умин фарди қудратманд дониста шудааст. Раҷаб Тайиб Ардуғон, раисҷумҳури Туркия, дар ҷойи 56, Абубакр ал Бағдодӣ, раҳбари ҳаракати террористии “Давлати исломӣ” 57, Башор Асад, расиҷумҳури Сурия 63 ва Ҷастин Трудо, нахуствазири Канада дар ҷойи 66-ум омадааст. Барак Обама, ки умри раёсатҷумҳуриаш дар ҳоли поён ёфтан аст, ҳанӯз 48-умин шахси қудратманди ҷаҳон маҳсуб шудааст.

Мӯҳр

Хабарҳои монанд: