05 фев 2015 10:12Тоҷикистон / Сиёсат

Ифшои нақшаи “баҳорӣ”-и террористҳо барои Тоҷикистон

Дар пайи ҳушдорҳо аз “баҳори гарм” дар Тоҷикистон Кумитаи амнияти миллӣ аз ифшои нақшаи террористҳо барои баҳори соли равон дар Тоҷикистон хабар дод.

Мансур Умаров, муовини аввали раиси Кумитаи давлатии амнияти миллии Тоҷикистон 4 феврал зимни муаррифии лоиҳаи созишнома дар бораи ҳамкориҳои Тоҷикистону Покистон дар соҳаи амният дар рӯбарӯи вакилони тоҷик изҳор дошт, ахиран Исломобод 6 ҷангҷӯйро ба Душанбе истирдод кард, ки баҳори соли равон нияти амалӣ кардани амалҳои террористиро дар марказ ва шимоли Тоҷикистон доштаанд.

Ба иттилои Умаров дар миёни афроди истирдодшуда -- Қамариддин Аҳроров, раҳбари ҳаркати террористии “Ҷамоати Ансоруллоҳ”, чор шарики ӯ ва як ҷангҷӯи Толибон ҳаст, ки ҳама шаҳрванди Тоҷикистон буда, дар муассисаҳои махсус дар минтақаи Вазиристони Покистон таълим гирифтаанд.

Ӯ дар назди вакилон изҳор доштааст, созишномаи дутарафаи Тоҷикистону Покистон дар умури амният, ки аз ҷониби парлумон тасдиқ шуд, барои пурзӯр намудани мубориза бо терроризму ифротгароӣ мусоидат мекунад.

Ифшои нақшаи “баҳорӣ”-и террористҳо дар ҳолест, ки қаблан Рамазон Раҳимзода, вазири умури дохилии Тоҷикистон ба суоли “Озодагон” оид ба он ки гӯиё ҳудуди 4 ҳазор ҷангҷӯ дар назди сарҳади Тоҷикистон ҷамъ омадаанд ва таҳдид доранд, баҳори соли равон худро нишон хоҳанд дод, посух дод, “воқеан чунин маълумот вуҷуд дорад. Дар пайи амалиёт алайҳи ҷангҷӯён дар қаламрави Покистон онҳо ба наздикиҳои сарҳад ҳаракат доранд.”

Қаблан Замир Кобулов, фиристодаи вижаи Владимир Путин, раисиҷумҳури Русия дар умури Афғонистон аз таҷаммӯи ҷангҷӯён дар сарҳади Тоҷикистон хабар дода, аз таҳдиди “баҳори гарм” дар Осиёи Марказӣ суҳбат карда буд: “Тибқи иттилое, ки ба мо расида истодааст, ҷангҷӯёни Афғонистон иддао доранд, баҳори оянда худро нишон хоҳанд дод. То баҳор интизор мешавем, вақт нишон хоҳад дод. Ба ҳар сурат мақомоти Тоҷикистон, Узбакистон ва Қирғизистон ин иттилоъро доранд ва бояд чораҳои дахлдор андешанд.”

Мӯҳр

Хабарҳои монанд: