06 окт 2014 10:13Тоҷикистон / Иҷтимоӣ

Эмомалӣ Раҳмон сафари худро ба Хатлон аз ноҳияи Панҷ оғоз намуд

Имрӯз, 6 октябр, президенти Тоҷикистон Эмомалӣ Раҳмон барои шиносоӣ бо вазъи зиндагии мардум ва вусъат бахшидан ба корҳои созандагию бунёдкорӣ ба минтақаи Қурғонтеппаи вилояти Хатлон сафар кард.

Боздиди кории раисҷумҳур аз ноҳияи Панҷ оғоз ёфт. Дар оғози сафари корӣ, ҷаноби Раҳмон дар расми баҳрабардорӣ аз як меҳмонхонаи навбунёди шахсӣ ва маркази савдои Файзи Кабир иштирок намуд. Дар ҳамон ҷо хатнасури дастаҷамъонаи 100 писарча ва тӯи 6 ҷуфти навхонадорон аз оилаҳои ниёзманд ороста шуд.

Дар ҷамоати шаҳраки Панҷ як коргоҳи дӯзандагӣ ба кор дароварда шуд. Эмомалӣ Раҳмон дар ин маросим аз зарурат ва имконоти рушди ҳунарҳои зебои дастӣ - гулдӯзию зардӯзӣ ва қолинбофии дастӣ гуфта, таъкид дошт, ки ба ин васила метавон ҳазорон нафар занону духтаронро дар хонаҳояшон бо кору даромади хуб таъмин кард.

Дар хоҷагии деҳқонии Ҷонони ҷамоати деҳоти Кабут Сайфиддинов, Эмомалӣ Раҳмон бо маҳсули кори кишоварзон шинос шуда, бо роҳбарияту фаъолон ва намояндагони мардуми ноҳияи Панҷ мулоқот намуд. Раҳмон дастур дод, ки бо назардошти афзоиши талабот ба сабзавоти барвақтӣ, хусусан картошка ва пиёзу сабзӣ дар бозори дохилӣ ва хориҷӣ, майдони кишти ин зироатҳо дар ин ва дигар ноҳияҳои кишвар васеъ карда шавад.

Зимни мулоқот бо роҳбарону фаъолони ноҳияи Панҷ, президент барои суръат бахшидан ба корҳои созандагию бунёдкорӣ, боло бурдани нишондодҳои истеҳсолӣ ва ҷойҳои нави корӣ, истифодаи пурсамар аз заминҳои корам, васеъ ба роҳ мондани кишти такрорӣ ва дигар тадбирҳои муҳим ба масъулин супоришҳои мушаххас дод.

Моро ҳамроҳӣ кунед:
Дар ФЕЙСБУК (FACEBOOK)
Дар ЮТЮБ (YOUTUBE)

Мӯҳр

Хабарҳои монанд: