17 май 2014 10:26Тоҷикистон / Рӯ ба рӯ
“Фабрикаи ҷавоб”: Имиҷсоз ё имиҷсӯз?
Дар кишвари мо як фабрика ҳаст, ки фаъолияти шаборӯзӣ дорад. На бебарқӣ ба фаъолияташ таъсир дораду на бархӯрди кормандони андоз. Аммо хурсанд нашавед, хонандагони гиромӣ, ин фабрика на ҷуроб истеҳсол мекунаду на калӯш. Ин фабрика танҳову танҳо гап мебофаду ҳарза мепароканад. Гоҳо ба тавлиди таҳқир ҳам даст мезанад. Ин фабрика бо номи «Фабрикаи ҷавоб» маълум аст.
Ба назар мерасад ҳадафи “Фабрикаи ҷавоб” ва фейкҳои шумораашон беҳисоби шабакаҳои иҷтимоӣ, ки шабу рӯз аз манофеи миллату давлат менависанд, танҳо неш задан ба мухолифони ҳукумати Тоҷикистон аст. Агар чунин набошад, чаро дар баробари ҳаводиси марзӣ бо Қирғизистон хомӯширо авло медонанд? Дар мавриди баъзе масъалаҳои марбут ба ҳамсоякишварҳои дигар ҳам, ки ба миллати тоҷик иртибот доранд, сукут ихтиёр мекунанд.
Онҳо ҳамеша аз ваҳдату фарҳанг ва якпорчагии миллат мегӯянд, аммо гӯиё душмани рақами яки ин ҳама Ҳизби наҳзати исломӣ, Тураҷонзодаҳо, Додоҷони Атовулло ва чанд нафари дигар бошанд, ки зери борони танқиду таҳқирашон қарор медиҳанд. Ҳар каси дигар ҳам ки ҳукуматро барои кадом як мушкил интиқод мекунад ё аз кадом мушкил мегӯяд зери танқиди “Фабрикаи ҷавоб” дар расонаҳои давлатӣ қарор мегирад ва фейкҳо дар шабакаҳои иҷтимоӣ бадтарин суханҳоро дар ҳаққашон раво мебинанд.
Воқеоти ахир дар марзи Тоҷикистону Қирғизистонро ҳама медонад. Ҷониби Қирғизистон зуд сафири Тоҷикистонро даъват кард ва нотаи эътирозӣ супурд. Тоҷикистон хомӯш буд. Тамоми мақомоти Қирғизистон барои журналистонашон дастрас буданд. Тоҷикистон хомӯш. Ин хомӯшӣ аслан ҷои тааҷуб надорад. Пештарҳо ҳам чунин мавқеи Душанбеи расмиро зиёд дидаем. Аммо “Фабрика” бо номҳои мустаор ва фейкҳои шабакаҳои иҷтимоӣ, ки бо андешаронии тунд нисбат ба мухолифон ном баровардаанд, низ хомӯш буданд.
Шояд дар тасаввури “Фабрика” ва фейкҳо танҳо мухолифони дохилӣ ваҳдати тоҷиконро ба ҳам мезанад ва манофеи миллиро зери суол мебарад. Ё шояд дар майнаи онҳо чунин фикр ҷой карда шудааст.
Қирғизистон бо вуҷуди он ки шаҳрвандон ё марзбононаш гунаҳкоранд ё не, аз худ ҳимоят мекунад ва дар нисбати низоъҳо дар марзаш вокунишҳои саривақтӣ ва тунд медиҳад. “Фабрика”-и мудофеи миллат гуиё ҳарфи гуфтанӣ надорад. Дар шабакаҳои иҷтимоӣ ҳам фейкҳо “ғайб” мезананд.
Соҳибназарон мегӯянд, “фабрика” ҳамон мақомот аст ва фейкҳое, ки дар шабакаҳои иҷтимоӣ алайҳи мухолифон “ҷанг” эълон кардаанд низ “одамон”-и онҳоанд. Агар воқеан ин андешаҳо асос дошта бошад, пас бояд барои ниҳодҳое, ки чунин “хидматгор” доранд, афсӯс хӯрд. Аслан душвор аст бовар кардан, ки аъзои “фабрика” ва фейкҳо, ки баъзан ҳадди одобу ахлоқро бешармона убур мекунанд, аз ҷониби мақомот баргузида шудаанд. Инҳо ҳамон “хизматҳои хирсона”-ро анҷом медиҳанд, ки билохира бар зарари хоҷаҳояшон анҷом меёбад. Чунин шеваи бархӯрд бо мухолифон ҳеч гоҳ дурудароз муваффақ буда наметавонад. Он на имиҷсоз, балки имиҷсӯз аст. На ҳукумате ва на мақомдореро пойдор намегардонад.
Баъзан, баҳсҳои “фабрика” ва фейкҳо занакҷангро ба хотир меорад, ки аз дур истодаву унвонии ҳафт пушти ҳамдигар ҳақоратҳои болохонадор мефиристанд.
Мақоли “агар ҳеч айби душманатро наёфтӣ, бигӯ думи сагаш каҷ аст” ҳам мувофиқи ҳамин ҳол аст. Зеро дар матлабҳои “фабрика” ва навиштаҳои фейкҳо бештар ба шахсият ва ё кадом як нуқси ҷинсии одами мавриди назар “ҳуҷум” мешавад. Агар мехоҳанд ба кадом навиштае ҷавоб гӯянд, шахсияти муаллифро “титу пит” мекунанд. Онҳо бо далели муътамад ва илмӣ баҳс накарда, шахсияти муаллифро таҳқир месозанд...
Ҳоло хулоса ин хоҳад шуд, ки агар мақомоти давлатӣ бо ин ҳама нерӯ ва тавон ба чунин одамоне имиҷашро бовар кардааст, пас вой бар онҳо (мақомот)-ву инҳо (мухолифон) ва мо (мардуми одӣ).
Барои он вой бар онҳо, ки гуфтем як рӯз не як рӯз бар зарари худашон тамом мешавад. Вой бар инҳо барои он ки рақиби арзанда надоштаанд ва вой бар мо барои он ки даъвоҳоямон барои миллати фарҳангиву тамаддунофар афсонае беш набудааст. Мӯҳр
Эзоҳ илова кунед
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
АХБОРИ ҶОЛИБ
10:09, 04 ноябр 2017
ТАҚВИМ
| « Ноябр 2024 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | ||||
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | |
