03 дек 2013 16:15Тоҷикистон / Дидгоҳи хос

Вакилони Зайд хостори гуфтугӯи ошкоро бо Раҳмон шуданд

Фахриддин Зокиров, Шӯҳрат Қудратов ва Исҳоқ Табаров – се вакили мудофеи Зайд Саидов, соҳибкор ва раҳбари боздоштшудаи Тоҷикистони нав ба Эмомалӣ Раҳмон муроҷиат карда, аз ӯ хостаанд, ба қазияи нафари таҳти ҳимояташон дахолат кунад.

Вакилон бо ирсоли муроҷиатнома ба унвонии Эмомалӣ Раҳмон гуфтаанд, парвандаи Зайд Саидов ангезаи сиёсӣ дошта, фармоишист. Ба навиштаи онҳо, “тақрибан ҳафт моҳ мешавад, ки мақомот кӯшиш доранд собиқ узви ҳукумати ҷумҳурӣ ва яке аз муваффақтарин соҳибкорони кишвар – Зайд Саидовро ба ҷинояткорӣ муттаҳам созанд”.

Вакилон аз қонуншиканиҳои мақомоти тафтишотӣ изҳори нигаронӣ намуда, меафзоянд, муроҷиатҳои пайвастаашон барои таъмини риояи қонуният ва чораҷӯӣ вобаста ба ҳолатҳое, ки ба қонуншиканӣ даст задани масъулинро собит месозанд, сарфи назар мешаванд: “Ин ҳама ишора ба он дорад, ки тафтишот аслан амалиётест фармоишиву тарҳрезишуда ва ғараз аз он ба муҷозот кашидани шахсест танҳо ба хотири он ки бо истифода аз ҳуқуқи конститутсиониаш хостааст ба фаъолияти сиёсӣ даст бизанад.”

Вакилони Зайд Саидов барои исботи фармоишию ғаразнок будани тафтишот алайҳи зерҳимояашон паҳни ройгони китобчаро бо тӯҳмату бӯҳтон дар ҳаққи ӯ зикр кардаанд, ки аз ҷониби мақомот мавриди омӯзиш қарор нагирифт. Онҳо меафзоянд, “бо вуҷуди он ки эҳтимоли бегуноҳиро ҳатто Конститутсия кафолат додааст ва тибқи он касеро бе ҳукми эътибордоштаи суд (додгоҳ) ҷинояткор донистан мумкин нест, роҳбарияти Агентии назорати давлатии молиявӣ ва мубориза бо коррупсия бо истифода аз васоити ахбори умум Зайд Саидовро ба мардум тарзе расман муаррифӣ карданд, ки ӯ гӯиё дар вазнинтарин ҷиноятҳо даст дорад.”

Вакилон мегӯянд, ахиран яке аз қонуншиканиҳои мақомоти тафтишотӣ-хулосаи қалбакии ташхиси ДНК ошкор гардид, ки чунин амалро таърихи додгоҳу тафтишот ёд надорад: “Масалан худи ҳамон сохтакории гӯшношунид ҷиноят аст, вале он чиз гӯшношунид аст, ки сарфи назар аз муроҷиатамон дар ин хусус ба Прокурори генералӣ, на танҳо вокуниши муносиберо интизор нашудем, балки худи муроҷиат барои баррасӣ ба суд фиристода шудааст. Яъне мувофиқи мантиқи прокуратура суд чизи чун қалбакӣ собитшударо бояд чун далел ҳисобад ё не.”

Вакилони Зайд Саидов таъкид мекунанд, имкони тариқи мурофиавӣ исбот намудани бегуноҳии зерҳимояашонро доранд. Онҳо мегӯянд, мақсад аз муроҷиташон ба раисиҷумҳур на баҳогузории далелҳост, ки ҳуқуқи мустаснои додгоҳ аст: “Балки мехоҳем мавриди пурсишу санҷишу ҷавобгарӣ масъулине қарор гиранд, ки худ дар қонуншиканӣ даст доранд ва ба ин васила мехоҳанд нафареро ҷинояткор муаррифӣ созанд.”

Вакилони дифоъ барои ифшои қонуншиканиҳои дигари мақомоти тафтишотӣ аз раисиҷумҳури Тоҷикистон хостаанд, онҳоро ба ҳузур пазирад: “Бе муболиға тафтишот саропо қонуншиканист ва аз собиқаи фаъолиятамон, ҳамчунин бо шиносоӣ аз таҷрибаи дигари тафтишотиву судӣ бо масъулияти том метавонем арз кунем, ки ин гуна бедодгарӣ, бемасъулиятӣ ва муносибати бағоят беэътиноӣ ба қонуну қонуният назир надорад. Аз Шумо чун ҳомии Конститутсия ва қонунҳо, ҳуқуқу озодиҳои инсон ва шаҳрванд (моддаи 64 Конститутсияи Ҷумҳурии Тоҷикистон) хоҳиш мекунем барои санҷиши ҳолатҳои даст ба қонуншиканӣ задани масъулини марбутаи мақомоти ҳифзи ҳуқуқ ва ба ҷавобгарӣ кашидани нафарони гунаҳгор мусоидат намоед.”

Вакилони дифои Зайд Саидов мегӯянд, илоҷи дигареро ҷуз ин мулоқот ба президент намебинанд, зеро мутмаинанд, яке аз сабабҳои асосии вазъи ногувори баамаломада дар қазияи Зайд ин аст, ки мақомоти марбута кӯшиш доранд ҳолатҳои воқеии тафтиш ва кору борашонро аз раисиҷумҳур рупӯш созанд.

Зайд Саидов, соҳибкори муваффақ ва собиқ вазири саноати Тоҷикистон, баъд аз эълони азмаш барои таъсиси ҳизби “Тоҷикистони нав” боздошт шуда, айни ҳол дар фасодкорӣ, қаллобӣ, сӯиистифода аз мавқеъ, бисёрзанӣ ва таҷовуз ба номус муттаҳам мешавад. Мурофиаи додгоҳии Зайд Саидов нимаи моҳи сентябр пушти дарҳои баста оғоз гардида, айни ҳол ба марҳилаи ниҳоӣ расидааст. Баромади ниҳоии айбдоркунандаи давлатӣ аз рӯзи чоршанбеи 4 декабр ба 5 декабр гузошта шуда ва ҷониби ҳимоя охирин суханашро рӯзи ҷумъаи 6 декабр ироа хоҳад кард.

Мӯҳр

Хабарҳои монанд: