"Flydubai" Душанбеву Дубайро бо ҳам пайваст
Ширкати ҳавопаймоии «Flydubai»-и Аморати Муттаҳидаи Араб нахустин парвоз дар хатсайри Дубай -- Душанберо анҷом дод.
Ин парвоз рӯзи 30-уми апрел тавассути ҳавопаймои Boeing 737-800 сурат гирифт.
Аз Фурудгоҳи байналмилалии шаҳри Душанбе ба хабаргузории “Озодагон” гуфтанд, “дар ҳоли ҳозир парвозҳо дар ин хатсайр ҳафтае 2 маротиба, рӯзҳои сешанбе ва панҷшанбе анҷом дода мешавад. Дар сурати зиёд шудани хоҳишмандон имкони афзудани парвозҳо мавҷуд аст”.
Парвозҳои самти Дубай-Душанбе 20-умин хатсайри ширкати ҳавопаймоии «Flydubai»-и Аморати Муттаҳидаи Араб ба кишварҳои пасошӯравӣ будааст. «Flydubai» соли 2009 ба фаъолият шурӯъ карда, соҳиби 23 ҳавопаймои мусофирбари Boeing-737-800 мебошад.