Рейтинги нави ФИФА: Тоҷикистон 40 қадам ба пеш гузошт
Тими Испания -- қаҳрамони феълии ҷаҳону Аврупо оид ба футбол дар рейтинги нави ФИФА аз миёни 209 даста чун пештара дар садри ҷадвал қарор дорад. Олмон дувум ва Аргентина дар зинаи сеюм ҷо гирифтаанд.
Тимҳои Хорватия, Португалия, Колумбия, Инглистон, Итолиё, Ҳолланд ва Эквадор миёни даҳгонаи беҳтаринанд.
Дар миёни тимҳои собиқ кишварҳои Шӯравӣ Русия дар ҷои 11, Украина 37, Узбакистон 66, Белорус 69, Арманистон 90, Гурҷистон 91, Эстония 93, Латвия 110, Литва 111, Тоҷикистон 112, Озарбойҷон 120, Туркманистон 131, Молдова 138, Қирғизистон 142 ва Қазоқистон дар ҷойи 144-ум аст.
Тоҷикистон дар миёни 46 тими Осиё мақоми 13-умро касб кардааст. Дастаҳои- Ҷопон (29), Кореяи Ҷанубӣ (42), Австралия (46), Эрон (56), Узбакистон (66), Урдун (76), Амороти Муттаҳидаи Араб (89), Ироқ (96), Чин (98) ва Қатар (102) ба даҳгонаи беҳтарини Осиё шомил шудаанд.