Омбудсмени қирғиз вазири тоҷикро аз гуруснанишинӣ боздошт

Турсунбек Акун, омбудсмени қирғиз, Равшанбек Собиров, собиқ вазири рушди иҷтимоии Қирғизистон ва раиси ҷамъияти тоҷикони ин кишварро аз гуруснанишинӣ боздоштааст.

Пайвандони Собиров, ки дар гирифтани пора муттаҳам мешавад, ба хабаргузории “Озодагон” иттилоъ доданд, ки бо дахолати омбудсмени қирғиз Собиров аз гуруснанишинӣ даст кашидааст. “Вазъи саломатии Собиров бад аст. Аз бемории дил азият мекашад”-мегӯянд пайвандони раиси ҷамъияти тоҷикони Қирғизистон.

Дар ҳамин ҳол ҷамъияти тоҷикон дар Қирғизистон бо ирсоли нома ба Равшан Собиров дар боздоштгоҳ изҳори дастгирии руҳию равонӣ карда, таъкид намудаанд, ки муътақиданд, Собиров дар ҷиноятҳое, ки муттаҳам мешавад, даст надорад.

Рӯзи ҳафтуми марти соли ҷорӣ Додгоҳи шаҳри Бишкек мурофиаи Равшан Собировро ба поён бурда, ӯро ба панҷ соли зиндон маҳкум кард. Ин додгоҳ ҳамчунин гуфт, тамоми амволи Собиров бояд мусодира гардад. Бо нишони эътироз аз ин ҳукми додгоҳ чанде пеш Собиров гуруснанишинӣ эълон карда буд.

Равшан Собиров ба он айбдор шудааст, ки дар замони вазири рушди иҷтимоии ин кишвар буданаш гӯиё ба ришвахӯрӣ даст задааст. Парванда алайҳи ӯ бо нишондоди собиқ ёвараш, Тоҳир Мирзоаҳмадов оғоз гардида буд, ки 4-уми июли соли 2012, зимни гирифтани ришва аз як ширкати итолиёвӣ дастгир шудааст. Ӯ изҳор доштааст, ки маблағро бо дастури Собиров гирифтааст, вале баъдан эътирофоташро ба манфиати Равшан Собиров тағйир дода буд.

Равшан Собиров, ки моҳи декабри соли 2011 вазири рушди иҷтимоии Қирғизистон таъин гардид, моҳи июли соли 2012 дар робита ба иттиҳомот дар фасодкорӣ муваққатан аз ин мансаб барканор гардид. Ӯ панҷуми июли соли 2012 боздошт ва ба боздоштгоҳи Кумитаи амнияти миллии Қирғизистон интиқол ёфта буд. Додгоҳи ноҳияи Первомайски Бишкек, Собировро моҳи ноябри соли 2012 «сафед» эълон кард. Аммо додситонии кулли Қирғизистон парвандаи Собировро аз нав ба баррасӣ гирифта, ба додгоҳ ирсол намуд, ки бо панҷ сол ҳукми зиндон ва мусодираи амволаш поён ёфт.