Видеои куштори навраси тоҷик дар Маскав
Пойгоҳи Lifenews.ru видеои куштори навраси 15-солаи тоҷик дар шаҳри Маскавро нашр кард, ки тавассути дурбинҳои назоратӣ сабт шудааст.
Шоми 25–уми феврал дар қисмати шимолии пойтахти Русия як навраси 15-солаи тоҷик кушта шуд, ки ба қавли мақомоти пулис хонандаи синфи 9-уми яке аз мактабҳои Маскав буд. Маъмурони пулис гуфтанд, ин навраси тоҷик дар наздикии истгоҳи метрои "Петровско-Разумовская" аз тарафи ашхоси номаълум бо зарби корд ба қатл расидааст.
Ба иттилои манбаъ, ин шаҳрванди тоҷик ҳамроҳи волидонаш дар шаҳри Маскав зиндагӣ мекардааст. Сафорати Тоҷикистон дар Маскав мегӯяд, писарбачае, ки шоми 25-уми феврал кушта шуд, Абдуғаниев Муқимҷон Мухторович ном дошта, зодаи Тоҷикистон аст.