Футболбозони “Истиқлол” дар Кувайт омодагӣ мебинанд

Дастаи “Истиқлол”-и Душанбе марҳилаи севуми омодагии худро оид ба мавсими нави футбол дар Кувайт анҷом медиҳад.

Дар ин бора сомонаи расмии ФФТ хабар додааст. Манбаъ аз қавли Шоҳрух Саидов, раиси бошгоҳи футболи “Истиқлол”, навиштааст, ки футболбозони тими “Истиқлол” баъди анҷоми мусобиқаи интихобии Ҷоми даъвати АФК дар Бишкек, ки ба ҳайати мунтахаби Тоҷикистон 12 бозигари “Истиқлол” ҳунарнамои мекунанд, ба Кувайт сафар мекунанд.

Гуфта мешавад, ки ҷамъомади таълимиву тамринии бозигарони “Истиқлол” дар Кувайт аз имрӯз, 25-уми март то 5-уми апрел баргузор мешавад. Дар ҷараёни омодагӣ ба мавсими нави футбол, ду бозии санҷишӣ бо бошгоҳҳои маҳаллии ин кишвар дар назар аст.

Ёдовар мешавем, ки бошгоҳи футболи “Истиқлол”-и Душанбе дар шаҳри Қайроққум бо дастаи “Уротеппа”-и Истаравшан, қаҳрамони вилояти Суғд бозии санҷишӣ анҷом дода, бо ҳисоби калони 6:1 пирӯз шуд.