“Милан” ”Барселона”-ро шикаст дод

Дидори дастаҳои “Галатасарай”-и Туркия ва “Шалке-04”-и Олмон мусовӣ- 1:1 анҷом ёфт. Ҳарду гол дар нимаи аввали бозӣ зада шуд. Голи аввалро Бурак Йилмаз, бозигари дастаи “Галатасарай” дар дақиқаи 12-уми ба ҳадаф расонд. Дар дақиқаи охири нимаи аввали дидор (45-ум) Ҷермейн Ҷонс тубро ба дарвозаи ҳариф ворид намуда, ҳисобро баробар кард.

Бозии дигари даври аввали 1/8 ниҳоӣ, миёни тимҳои “Милан”-и Италия ва “Барселона”-и Испания бо ҳисоби 2:0 тамом шуд. Голҳоро Кевин-Принс Боатенг ва Салли Мунтари ба ҳадаф расонданд.

Ёдовар мешавем, ду бозии дигари даври аввали 1/8 ниҳоии Лигаи Қаҳрамонҳои Аврупо бегоҳи 19-уми феврал баргузор гардид. «Арсенал»-и Англия бо тими «Бавария»-и Олмон вориди сабқат шуда, бо ҳисоби 1:3 шикаст хурд. Бозии дигар миёни тимҳои «Порто»-и Португалия ва «Малага»-и Испания сурат гирифт, ки дар ин сабқат футболбозони португалиягӣ бо ҳисоби 1:0 ғолиб омаданд. Чор бозии дигари даври аввали 1/8 ниҳоӣ ҳафтаи гузашта баргузор гардид.

Бозиҳои такрории Лигаи Қаҳрамонҳои Аврупо аз 6-уми март шурӯъ мешавад.