Мусобиқаи гӯштини миллӣ дар Кӯлоб. Бокс дар Белярски Русия

Аз 15-ум то 16-уми декабри соли равон дар шаҳри Кӯлоби вилояти Хатлон мусобиқаи кушоди ҷумҳуриявӣ оид ба гӯштини миллӣ байни ҷавонони соли таваллудашон 1998-1999 доир мегардад.

Тавре ба Озодагон аз Кумитаи ҷавонон, варзиш ва сайёҳӣ хабар доданд, дар чорабинӣ, ки қувваозмоӣ дар вазнҳои 44, 48, 52, 56, 60 ва +60 кг сурат мегирад, ширкати ҳайати дастаҳои шаҳри Душанбе, вилоёти Суғд, Хатлон, ВМКБ, шаҳру навоҳии тобеи марказ ва водии Рашт дар назар аст.

Дар ҷамъбасти мусобиқа ғолибону ҷоизадорон бо медалу дипломҳои Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон қадрдонӣ хоҳанд шуд.

Дар шаҳри Белярски Федератсияи Русия бошад,  Ҷоми ҷаҳон оид ба бокс миёни кишварҳои истеҳсолкунандаи нафт доир шуда истодааст, ки он то 12-уми декабри соли ҷорӣ идома дорад. Тоҷикистонро дар ин чорабинӣ Меҳроҷиддин Каримов, таҳти сарпарастии Кумитаи андози кишвар муаррифӣ мекунад.