«Ҳафтаи таҳсил»-и Амрико. Дар Душанбе ва саросари кишвар

Дар Тоҷикистон ҳафтаи таҳсили байналмилалӣ таҷлил мегардад.

Тибқи иттилои сафорати ИМА дар Душанбе, ин чорабинӣ аз рӯзи 13-уми ноябр шурӯъ гардида, расми ифтитоҳи он дар «Гӯшаи Амрико» воқеъ дар ошёнаи 4-уми Китобхонаи миллӣ сурат мепазирад. Гуфта мешавад, ҳафта аз соати 14:00 то 17:00 баргузор гашта, дар он муассисаҳои таълимӣ аз қабили ACCELS, EducationUSA, IREX, Bactria Cultural Center, Tempus, DAAD, UCA ва «Гӯшаи Амрико» иштирок хоҳанд кард. Ҳар яке аз ин муассисаҳо ба ҳавасмандон оиди барномаҳои таълимии худ ва имконоти таҳсил маълумот пешниҳод намуда, ҳамчунин ба саволҳои онҳо ҷавоб хоҳанд дод.

 

Бино ба қавли манбаъ, намоишгоҳ бо суханони ифтитоҳии намояндагони Сафорати ИМА дар Тоҷикистон ва Вазорати маорифи кишвар шурӯъ мешавад. Ҳамчунин, рӯзҳои 14 – 16 ноябр дар тамоми гӯшаву канори Тоҷикистон чорабиниҳо дар мавзӯҳои гуногуни таълимӣ ва имконоти таҳсил сурат хоҳанд гирифт. Барои шинос шудан бо барномаи пурраи ҳафтаи таҳсили байналмилалӣ лутфан ба ин саҳифа муроҷиат кунед:https://dushanbe.usembassy.gov/program_announcements.html

Маврид ба тазаккур аст, ки ҳафтаи таҳсили байналмилалӣ имкониятест, барои дар тамоми гӯшаву канори ҷаҳон таҷлил намудани самараи таҳсил ва табодули байналмилалӣ. Ин ташаббуси муштараки Департаменти давлатӣ ва Вазорати маорифи ИМА ҷузъе аз кӯшишҳои Иёлоти Муттаҳида дар тарғиби барномаҳое, ки аз як тараф,  барои омода сохтани халқи Амрико ба зиндагӣ дар муҳити ҷаҳонӣ равона гашта, аз тарафи дигар, пешвоёни кишварҳои дигарро ба омӯхтан ва истифода бурдани таҷрибаи пешқадами Иёлоти Муттаҳида ҷалб менамояд.