Бохти калони тими Тоҷикистон. Аз Эрон

Дастаи мунтахаби футболи Тоҷикистон, ки бо тими миллии футболи Эрон бозии дӯстона анҷом дод, ба ҳисоби 1:6 шикаст хурд.

Сабқати дӯстона миёни тимҳои мунтахаби миллии Эрон ва Тоҷикистон дирӯз, 6-уми ноябр дар варзишгоҳи «Озодӣ»-и Теҳрон соати 16-у 30 дақиқаи вақти Эрон ва  16:00 ба вақти Душанбе баргузор шуд.

Абулқосим Деҳнавӣ, футболбози эронӣ  дар дақиқаи 9-уми нимаи аввали дидор ҳисобро боз намуд (1:0). Ёқуб Каримӣ дар дақиқаи 12-уми бозӣ голи дуюмро вориди дарвозаи дастаи мунтахаби Тоҷикистон намуд (2:0) Абулқосим Деҳнавӣ голи сеюмро дар дақиқаи 30-юм ба ҳадаф расонд (3:0). Дақиқаи 31-уми дидор Ёқуб Каримӣ голи чорумро вориди дарвоза намуд (4:0). Ҳамин тариқ дастаи мизбонон дар нимаи дуюуми бозӣ ду голи дигар ба ҳадаф расонданду футболбозони тоҷик танҳо ба як гол посух гуфта тавонистанд.

Аҳмад Ҳасанзо дақиқаи 49-ум голи 5-умро зад (5:0). Голи ягонаи бозингарони тоҷикро Соҳиб Саванқулов, бозингари мунтахаби Тоҷикистон дар дақиқаи 67-уми нимаи дувуми дидор зад. Алиризо Аббосфард дар дақиқаи 89-ум голи шашумро ба дарвозаи дастаи мухтахаби Тоҷикистон ба ҳадаф расонид (6:1).

Никола Кавазович, сармураббии тими миллии Тоҷикистон ба ҳайати дастаи мунтахаби кишвар 24 футболбозро аз панҷ бошгоҳи лигаи олии кишвар даъват намуда буд.

Ёдовар мешавем,  ин бозӣ барои дастаи мунтахаби Эрон як марҳилаи омодагӣ ба даври чоруми мусобиқаи интихобии қаҳрамони ҷаҳон-2014 маҳсуб мешавад.
Гуфта мешавад,  рӯзи 14-уми ноябр тими мунтахаби Эрон дар майдони худ бо тими миллии Ӯзбакистон вориди сабқат шаванд.