ВМ: Даъвати тирамоҳӣ ба сафи артиш оғоз гардид

Дар Тоҷикистон ду рӯз боз маъракаи даъвати тирамоҳии наваскарон ба сафи Артиши миллии кишвар идома дорад.

Тибқи иттилои дафтари матбуотии Вазорати дифоъ, ин маърака то рӯзи 30-юми ноябр давом карда, ҳоло ситоди танзими даъвати тирамоҳӣ таҳти сарварии муовини нахуствазири кишвар Руқия Қурбонова таъсис ёфта, фаъолият дорад: «Ин ситод ҳамоҳангии кори мақомоти маҳаллии ҳукумат ва вазорату муассисаҳои марбутаро назорату танзим менамояд».

Маврид ба ёдоварист, ба хизмати аскарӣ ҷавонони солҳои таваллудашон 1985-1994, ки дар сафи артиш хидмат накардаанд, даъват мешаванд. Фармони марбутаро райисҷумҳур таҳти рақами 1350 аз 14-уми сентябри соли равон ба имзо расонида буд.