Кашфу мусодираи беш аз 175 кило маводи нашъадор дар шимоли кишвар

Дар ин бора ба Озодагон аз шӯъбаи мубориза алайҳи гардиши ғайриқонунии маводи мухаддири РКД дар  вилояти Суғд иттилоъ доданд.

Тибқи иттилои манбаъ, дар давоми 8 моҳи соли ҷорӣ аз тарафи кормандони милисаи шаҳру навоҳии вилоят аз гардиши ғайриқонунӣ 175 кг-у 739 грамм маводи нашъовар боздошт ва мусодира карда шуд: «Ин миқдор нисбати  нишондиҳандаи ҳамин давраи соли гузашта 122 кг кам медошад.Дар 8 моҳи соли гузашта аз гардиши ғайриқонунӣ зиёда аз 297 кг маводи мухаддир мусодира карда шуда буд». Аз ин миқдор, зиёда аз 24 кг маводи сахттаъсири ҳероин, 141 кг гурӯҳи бангдона, 9 кг афюнро  ташкил медиҳад.

Гуфтанист, аз рӯи ин ҷиноятҳо дар давраи сипаригардида, 145 парвандаи ҷиноӣ бо моддаҳои 200, 201 (муомилоти ғайриконунии  воситаҳои нашъадор, моддаҳои психотропи, ё прекурсорҳо бо мақсади ба соҳибияти каси дигар додан)-и КҶ ҶТ оғоз гардида, тафтишот идома дорад .