Тамдиди мӯҳлати ташхиси техникии нақлиёт

Шурӯъ аз имрӯз Русия мӯҳлати эътибори варақаҳои ташхиси техникии нақлиётро барои 1 соли дигар тамдид кард.

Яъне, касоне, ки барои соли 2011 нақлиёти худро аз ташхиси техникӣ гузаронидаанд, ба  таври атоматик ин мӯҳлат то ҳамин давраи соли 2012 идома хоҳад кард. Нафароне, ки аз ин ба баъд нақлиёти нав мехаранд, ҳангоми қайди давлатии нақлиёт дар мақомоти пулис ин гуна варақаҳои ТТ (ТО)-ро ройгон дарёфт хоҳанд кард.

Аммо тавре Хадамоти давлатии бехатарии ҳаракат (ГИБДД)-и ВКД-и Русия иттилоъ медиҳад, ин тасмим барои нақлиёти сабукраве, ки ба таври тиҷорӣ ба мусофиркашонӣ машғул мебошад, дахл надоштааст.

Гуфтанист, тасмими тамдид кардани мӯҳлати фаъолияти варақаҳои ТТ (ТО) яке аз тасмимҳои ахири президенти ин кишвар мебошад, ки ба андешаи коршиносон дар пешорӯи интихоботи президентӣ бо ҳар гуна тасмимҳои мусбӣ хоҳони касби бештари бовари мардум будааст.