Занги камолот садо дод, замони омодагӣ ба имтиҳонҳо расид

Имрӯз дар тамоми муассисаҳои таҳсилоти умумии Тоҷикистон Занги камолот садо дод.

Тавре ба Озодагон аз вазорати маориф хабард доданд, тибқи муқарарроти муайяншуда дар тамоми муассисаҳои таҳсилоти умумии ҷумҳурӣ чорабинии «Занги камолот» аз соати 800 то 845 сурат гирифт. Ташкили чорабиниҳои иловагӣ, ҷамъомаду тӯҳфасупорӣ ва сайругашту шабнишиниҳо ҳангоми гузаронидани чорабинии «Занги камолот» манъ карда шудааст.

Тибқи фармоиши вазири маорифи  Тоҷикистон аз 12 марти соли 2012 «Оид ба анҷоми соли хониши 2011-2012, аттестатсияи давлатии аз синф ба синфгузаронӣ ва хатм дар муассисаҳои таҳсилоти умумии Тоҷикистон» аттестатсияи давлатии аз синф ба синфгузаронии синфҳои 4 аз 1 то 6-уми июн, синфҳои 5-8 ва 10 (11)-и ҳамаи намуди муассисаҳои таҳсилоти умумӣ аз 26 то 31-уми май ва барои синфҳои 10 (11), ки аз рӯи равия ва равияҳои соҳавӣ кор мекунанд, аз 26-уми май то 4-уми июн аз рӯи маводҳои тасдиқкардаи раёсати маорифи Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе, шӯъбаҳои маорифи шаҳру ноҳияҳои тобеи ҷумҳурӣ ва Маркази ҷумҳуриявии таълимию методии назди Вазорати маорифи  Тоҷикистон (барои муассисаҳои таълимии шаҳр ва ноҳияҳои тобеи ҷумҳурӣ) гузаронида мешавад.

Ҳамзамон, ба роҳбарони муассисаҳои таълимие, ки зиёда аз 5 синфи баробар (параллелӣ) доранд, иҷозат дода мешавад, ки мӯҳлати гузаронидани аттестатсияҳои аз синф ба синфгузарониро тибқи қарори шӯрои педагогӣ бо назардошти шумораи синфҳо то 5 рӯз тамдид намоянд.
Дар синфҳои 9-и ҳама намуди муассисаҳои таҳсилоти умумӣ аттестатсияи давлатии хатм аз 26 май то 9 июни соли 2012 гузаронида мешавад. Аттестатсияи давлатии хаттии хатми синфҳои 9-и муассисаҳои таҳсилоти умумӣ аз фанҳои "Алгебра" (хаттӣ) 28-уми май, "Забони модарӣ" (нақли хаттӣ) 2-юми июн, "Забони давлатӣ" (нақли хаттӣ) барои синфҳои таълимашон бо забони ғайритоҷикӣ, "Забони русӣ" (нақли хаттӣ) барои синфҳои таълимашон бо забони тоҷикӣ 6-уми июн аз рӯи маводи пешниҳодкардаи Маркази ҷумҳуриявии таълимию методии назди Вазорати маорифи Тоҷикистон гузаронида мешавад.

Дар синфҳои 11 (12)-и ҳамаи намуди муассисаҳои таҳсилоти миёнаи умумӣ бошад, аттестатсияи давлатии хатм аз 26-умимай то 16-уми июни соли 2012 гузаронида мешавад. Аттестатсияи давлатии хаттии хатми синфҳои 11 (12)-и муассисаҳои таҳсилоти умумӣ аз фанҳои "Адабиёт" (иншо) 30-юми май, "Алгебра" (хаттӣ) 04-уми июн, "Забони давлатӣ" (нақли хаттӣ) барои синфҳои таълимашон бо забони ғайритоҷикӣ, "Забони русӣ" (нақли хаттӣ) барои синфҳои таълимашон бо забони тоҷикӣ, "Забони хориҷӣ" (диктант), "Химия" ва "Технологияи информатсионӣ" (хаттӣ) 12-уми июни соли 2012 аз рӯи маводи пешниҳодкардаи Маркази ҷумҳуриявии таълимию методии назди Вазорати маорифи Тоҷикистон гузаронида мешавад.