Конгресменҳои ИМА: Белорусия мизбони чемпионати ҷаҳонии хоккей нашавад

Як гурӯҳ аз конгрессменҳои амрикоӣ аз Федератсияи байналмилалии хоккей (IIHF) хостаанд, ки Белорусияро аз ҳаққи мизбони сабқати ҷаҳонии хоккей дар соли 2014 будан маҳрум созад.

Ба қавли онҳо Белорусия ҳуқуқи инсонро нақз мекунад, интихоботҳояш ба меъёрҳои ҷаҳонӣ ҷавобгӯ нест ва мухолифинаш пайваста таъқиб мешаванд.

Қаблан, як қатор ҳомиёни ҳуқуқи башар аз кишварҳои Аврупо низ бо чунин дархост ба Федератсияи байналмилалии хоккей муроҷиат карда буданд.

Мавриди зикр аст, чемпионати ҷаҳон оид ба хоккей қарор аст, моҳи майи соли 2014 дар варзишгоҳҳои шаҳри Минск баргузор шавад. Соли 2009 конгресси IIHF тасмим гирифт, ки Белорусия мизбони навбатии мусобиқаи ҷаҳонии хоккей бошад.