Ду нафарро бо иттиҳоми нашъаҷаллобӣ 14 солӣ аз озодӣ маҳрум карданд

Додгоҳи олии Тоҷикистон Наҷибулло Носиров ва Диловар Даматовро дар муомилоти ғайриқонунии воситаҳои нашъадор ба миқдори махсусан калон муҷрим шинохта, ҳар кадомеро 14 солӣ аз озодӣ маҳрум кард.

Муҳлати ҷазоро онҳо дар калонияҳои низомаш пурзӯр пушти сар хоҳанд кард. Ҳамчунин, бо ҳукми суд молу мулки ин афрод мусодира мешавад.

Наҷибулло Носиров, сокини ноҳияи Ванҷ ва Диловар Даматов, истиқоматкунандаи ноҳияи Ҳамадонӣ, ки ҳар ду 23 сол доранд, 31 январи соли равон барои нигаҳдорӣ ва интиқоли миқдори махсусан калони маводи мухаддири навъи ҳашиш аз ҷониби кормандони Раёсати мубориза бар зидди гардиши ғайриқонунии маводи нашъадори ВКД дастгир шуда буданд.