Ғайратов: Фаъолияти ҲНИТ дар Кӯлоб мавриди тафтиш қарор нагирифтааст

Тибқи иттилои расонаҳо, ахиран дар Душанбе ва манотиқи дигари кишвар кормандони прокуратура ба тафтиши фаъолияти ҲНИТ шурӯъ намудаанд.

Ба гуфтаи ин манобеъ, «муфаттишони додситонӣ умдатан аз масъулини ҳизб дар бораи санади махфии мунташира бо номи протоколи 32-20 дар сомонаи русии «Звезда.ру» суол кардаанд. Сайти "Звезда.ру" зери унвони "Тоҷикистон дар остонаи инқилоб" мақолаеро якҷо бо ин аснод ба нашр расонида буд».

Дар ҳамин ҳол, Абдусамад Ғайратов, раиси бахши шаҳрии ҲНИТ дар шаҳри Кӯлоб ба  хабаргузории Озодагон гуфт: «Ҳеч гуна санчиш, тафтишот ва ё пурсиш аз фаъолияти ин бахш аз ҷониби кормандони мақомоти қудратӣ ва ҳуқуқӣ доир нагардидааст». Ҷаноби Ғайратов афзуд, имрӯз (30-юми март) дар дафтари бахш як семинар бо иштироки Сайидумар Ҳусайнӣ, вакили ҲНИТ дар порлумони кишвар доир гардид, ки аъзоёни бахш ширкат доштаанд ва дар ин маврид ҳам аз сӯйи мақомоти қудратӣ ягон монеаъ набуд.