Бекор шудани ҳалномаи додгоҳи Фирдавсӣ дар мавриди нашрияи «Миллат»

Ҳалномаи додгоҳи ноҳияи Фирдавсӣ алайҳи ҳафтаномаи «Миллат» аз сӯи раёсати додгоҳи шаҳри Душанбе бекор шуд.

Бояд тазаккур дод, ки додгоҳи ноҳияи Фирдавсӣ дар моҳи марти соли 2011 даъвои вазири кишоварзии Тоҷикистон Қосим Қосимовро алайҳи нашрияи “Миллат”-ро қонеъ карда ва ин нашрияро барои пардохти 1 ҳазору 500 сомонӣ ҷарима ва узрхоҳӣ муваззаф карда буд. Баъдан, ин қарори додгоҳро зинаи кассатсионии суди шаҳри Душанбе низ тайид карда буд.

Акнун ҳам ҳалномаи додгоҳи Фирдавсӣ ва ҳам қарори додгоҳи кассатсионӣ аз ҷониби раёсати суди шаҳри Душанбе лағв гардида, он барои баррасӣ бозбинии такрорӣ ирсол шудааст.

Ёдрас менамоем, Вазорати кишоварзӣ матлаби нашрнамудаи ҳафтаномаи «Миллат» зери номи «Вазорати кишоварзӣ фасодзадатарин ниҳод» дар яке аз шумораҳои ин ҳафтаномаро дар охири соли 2009  тӯҳмат хонда ва тақозои пардохти 1 миллион сомонӣ товон карда буд. Нашрияи «Миллат» низ даъвои мутақобила бурд ва аз вазорати кишоварзӣ 1 сомонӣ товон талаб кард.