316620 сомонӣ ҷоизаи Рустами Эмомалӣ барои ғолибони ниммарафони байналмилалӣ
Рустами Эмомалӣ, иҷрокунандаи раиси шаҳри Душанбе барои ғолибони 8-умин ниммарафони байналмилалӣ дар пойтахт 316620 сомонӣ ҷоизапулӣ ихтисос додааст.
Дафтари матбуоти шаҳрдорӣ мегӯяд, қарори Рустами Эмомалӣ дар ин бора 4 апрел ба имзо расида, тибқи он ниммарафон соати 09:00-и 15 апрел бахшида ба Рӯзи пойтахт баргузор мешавад. Ба иттилои манбаъ, оқои Эмомалӣ, ба муовинони худ, раҳбарияти навоҳӣ ва мақомоти қудративу Вазорати тандурустӣ дастур додааст, чорабинии мазкурро дар сатҳи баланд доир намоянд.
Масофаи ниммарафони байналмилалӣ 21 км 91 метрро дар бар гирифта, аз Наврӯзгоҳи пойтахт оғоз шуда, тариқи хатсайри маҳалҳои Чорбоғу “Водонассос” дар назди муҷассамаи Исмоили Сомонӣ хотима меёбад.
Маҳмадсаид Убайдуллоев, шаҳрдори собиқи пойтахт соли гузашта барои ғолибони ин марафон 267 400 сомонӣ ҷудо карда буд.
Акс аз бойгонӣ