Х.Ҳамроқулова: Тоҷикони воқеӣ аз қаҳрамонони сохтаи “Наша Раша”-и бозигарони арманӣ хеле фарқ мекунанд
Хуршеда Ҳамроқулова, дотсенти улуми филологии Мактаби олии иқтисодии Русия дар суханроние дар ҳузури донишҷӯён таъкид намудааст, тоҷикони воқеӣ аз қаҳрамонони сохтаи “Наша Раша”-и бозигарони арманӣ хеле фарқ мекунанд.
"Наша Раша" барномаи телевизиони ТНТ-и Русия буд, ки дар бахше аз он муҳоҷирони Осиёи Миёна, ба вижа тоҷикон масъара ва ҳатто таҳқир мешуданд. Ин барнома бо вокуниши зиёди соҳибназарони тоҷик рӯбарӯ шуда, билохира баста шуд. Аммо ҳанӯз муҳоҷиронро "Равшан ва Джамшуд", ки қаҳрамонҳои аслии барнома буданд, ном мебаранд.
Дар суханронӣ ё лексияи хонум Ҳамроқулова, ки таҳти унвони “Тоҷикон дар Русияи муосир” дар факултаи журналистикаи Донишгоҳи давлатии Маскав (МГУ) баргузор шуд, ӯ ба масъалаи муҳоҷирати тоҷикон пардохта, омили аслии онро вазъи иқтисодӣ гуфтааст. Ҷанги шаҳрвандӣ ба андешаи вай яке дигар аз далелҳои суръат гирифтани раванди муҳоҷирати тоҷикон ба Русия будааст.
Раиси Шӯрои ташкилоти ҷамъиятии “Маркази фарҳангии Тоҷикистон” дар бахши дигаре аз суханрониаш ба ҷазб шудани муҳоҷирон ба ҷомеаи Русия пардохта, таъкид кардааст, ин кор танҳо дар сатҳи созмонҳои фарҳангӣ ва ройгон имконпазир намебошад. Ба бовари вай, аз ин тариқ кор ба дарозо мекашад ва навбатпоӣ барои дарёфти кумаки ҳуқуқӣ афзоиш меёбад. Хуршеда Ҳамроқулова бо ишора ба хислати мардум тоҷик гуфтааст, онҳо меҳмоннавоз, бодиққату боадабанд, аммо таҳқирро намепазиранд.