Истиқболи Аврупо аз идеяи мактабхонҳои тоҷик барои сершир кардани говҳо
Се хонандаи мактаби байналмилалии Президентӣ ва 1 донишомӯзи литсейи шаҳри Турсунзода дар Аврупо усули зиёд намудани шир ва гӯшти говро муаррифӣ кардаанд.
Тавре аз Вазорати маорифи Тоҷикистон ба “Озодагон” иттилоъ доданд, дар олимпиадаи байналмилалии «Устувории муҳити атроф» дар шаҳри Амстердами Ҳолланд аз фанни биология миёни хонандагон аз 50 давлат, лоиҳаи наврасони тоҷик мавриди таваҷҷуҳи зиёд қарор гирифт.
Умедҷон Сафаров, директори Маркази ҷумҳуриявии дарёфт ва рушди истеъдодҳои назди Вазорати маориф ва илм мегӯяд, моҳияти лоиҳаи пешниҳоднамудаи хонандагони тоҷик истифодаи самараноки поруи биологии кирми абрешим дар хоҷагии қишлоқ барои парвариши чорво ва зиёд кардани маҳсулнокӣ дар шири онҳо мебошад: “Лоиҳаи пешниҳодгашта муайян намуд, ки парвариши кирми абрешим на фақат барои коркард дар саноат, балки поруи биологии ихроҷнамудаи он низ барои таъмини ғизои чорво муфид будааст. Барои таҷриба панҷ сар гови ширдеҳ интихоб гардида, муддати ду рӯз ба онҳо ғизо-сабӯс ва коҳ дода шуд. Пас аз ташхиси сифати шир муддати ду рӯзи дигар ғизои онҳоро бо истифода аз поруи биологии ихроҷнамудаи кирми абрешим ва коҳ иваз намуда, бори дигар маҳсулнокии сифати шири чорво дар се шакл - зичӣ, туршӣ ва равғаннокӣ ташхис карда шуд. Ташхис нишон дод, ки дар лоиҳаи таҳиягашта самаранокии зичӣ, туршӣ ва болоравии равғаннокӣ дар шири чорво ба миқдори 5% зиёд гардидааст”.
Ба гуфтаи Сафаров таҷриба нишон дод, ки поруи биологии кирми абрешим на танҳо барои сифатнокии шири гов, балки барои фарбеҳкунии чорво ва гарм нигоҳ доштани бадани онҳо дар фасли сармо низ фоидаовар аст. Ин дар ҳолест, ки ба гуфтаи масъулини вазорати маориф ҳамасола садҳо тонна поруи биологии ихроҷнамудаи кирми абрешим ҳамчун ашёи нолозим партофта мешавад.
Вазорати маорифи Тоҷикистон мегӯяд, лоиҳаи пешниҳоднамудаи хонандагони тоҷик аз тарафи олимони ҷаҳон дастгирӣ ёфта, барои истифода дар хоҷагии қишлоқи тамоми ҷаҳон тавсия дода шуд: “Дар ҷамъбасти олимпиада хонандагони тоҷик - Фирдавс Содиқов ва Мавлон Асоев сазовори медали биринҷӣ гардида, Парчами Тоҷикистонро дар байни 50 давлати дунё баланд бардоштанд”.