Даргузашти Муҳаммад Алӣ - “Шоҳи бокс” дар синни 74
Муҳаммад Алӣ, нахустин қаҳрамони секаратаи ҷаҳон дар вазни гарон рӯзи шанбеи 4-уми июн дар синни 74-солагӣ аз дунё даргузашт.
Тибқи иттилои расонаҳои амрикоӣ Муҳаммад Алӣ бо мушкили роҳҳои нафас рӯзи панҷшанбе дар беморхонаи шаҳри Феникс бистарӣ шуда буд. Ӯ инчунин аз соли 1984 то ҳозир аз бемории “паркинсон”, ранҷ мебурд, ки баъди чор соли рафтанаш аз варзиши касбӣ ба ин маризӣ мубтало шудааст.
Муҳаммад Алӣ, ки "Шоҳи бокс" унвон гирифтааст, дар зодгоҳаш шаҳри Луисвилли штати Кентукӣ дафн хоҳад шуд.
Алӣ нахустин муштзани ҷаҳон аст, ки се бор дар вазни гарон унвони қаҳрамони ҷаҳон гирифтааст. Нахуст ӯ соли 1964 ва баъдан солҳои 1974-у 1978 унвони қаҳрамони ҷаҳонро ба даст овард.