Мессӣ бори панҷум соҳиби “Тӯби тиллоӣ” шуд
Лионел Мессӣ, ҳамлагари дастаи “Барселона”-и Испания ва мунтахаби Аргентина маъруфтарин ҷоизаи марбут ба футбол -- “Тӯби тиллоӣ”-ро ба худ ихтисос дод.
Ин панҷумин “Тӯби тиллоӣ”-и Мессӣ ба шумор меравад. Имсол Криштану Роналду, ҳамлагари “Реал”-и Мадриду мунтахаби Португалия ва Неймар, ҳамлагари “Барселона”-ву мунтахаби Бразилия аз рақибони аслии Лионел Мессӣ буданд.
Маросими тақдими ҷоизаи “Тӯби тиллоӣ” шоми дирӯз, 11 январ дар шаҳри Сюрихи Швейсария, қароргоҳи ФИФА (Федератсияи байналмилалии Футбол) баргузор шуд. Тибқи муқаррароти ФИФА “Тӯби тиллоӣ” ба футболбозе тақдим мегардад, ки раъйи бештари мураббиёну капитанҳои дастаҳои мунтахаби ҷаҳон ва хабарнигоронро ба даст оварад.