Тоҷикистон мизбони мусобиқоти Осиё-2016 миёни духтарони то 14-сола
Конфедератсияи футболи Осиё Тоҷикистонро макони баргузории бозииҳои минтақавии мусобиқоти Осиё-2016 миёни духтарони то 14-сола интихоб кардааст.
Тавре Федерасияи футболи кишвар хабар медиҳад, дар баробари Тоҷикистон Қирғизистон, Бангладеш, Непал ва Шри-Ланка ҳам барои мизбони ин сабқат шудан, талош доштанд. Ба иттилои манбаъ, мусобиқоти Осиё миёни духтарон аз 18 апрел то якуми майи соли 2016 дар варзишгоҳи “Авиатор”-и пойтахт ва бошгоҳи клуби “Истиқлол” дар дараи Алмосии ноҳияи Ҳисор баргузор мешавад.
Дар ин сабқат нуҳ даста – Тоҷикистон, Эрон, Қирғизистон, Бангладеш, Бутан, Ҳиндустон, Малдив, Непал ва Шри-Ланка иштирок хоҳанд кард.