Дар Тоҷикистон боз замин ҷунбид
Маркази зилзиласанҷии Аврупо аз заминларзаи навбатӣ дар Тоҷикистон хабар дод.
Ба иттилои ин манбаъ, такони замин соати 21:32-и шоми дирӯз, 8 декабр ба қайд расида, шиддати он дар марказаш -- 318 километрии шарқи Душанбе 4,4 балл будааст. Манбаъ мегӯяд, ин 14-умин пасларза баъд аз заминларзаи рӯзи 7 декабр аст, ки 7,5 баллро ташкил дод.
Зилзилаи рӯзи 7 декабр дар 357 километрии ҷанубу-шарқи Душанбе ба вуқӯъ пайваста, иқтидори он дар пойтахт 3-4 балл ва маркази он 7-8 балл гуфта шуд. Дар пайи он 2 тан ба ҳалокат расида, даҳҳо нафари дигар ҷароҳат бардоштанд. Ба иттилои мақомоти Бадахшон зилзила беш аз 600 манзилро пурра хароб карда, 100 бинои дигар қисман зарар диданд.