Баъди таҳдиди гуруснанишинӣ: Мулоқоти як ба яки Ёров бо адвокат баргузор шуд
Дар пайи таҳдиди гуруснанишинии Бузургмеҳр Ёров, вакили боздоштшуда мақомот мулоқоти як ба яки ӯро бо ҳимоятгараш ташкил кардаанд.
Дар ин бора ба “Озодагон” яке аз наздикони Ёров хабар дод.
Ӯ афзуд, ки Бузургмеҳр Ёров ният доштааст, ки дар сурати баргузор накардани мулоқоти як ба якаш бо вакили дифоъ аз 9-уми ноябр даст ба гуруснанишинӣ мезанад: “Аммо хушбахтона хоҳиши ӯро дар боздоштгоҳ иҷро карданд ва мулоқоти як ба якаш бо вакили дифоъ баргузор гардид”.
Қаблан наздикони Ёров иттилоъ доданд, ки то ҳол мулоқотҳои ӯ бо вакили дифояш танҳо дар ҳузури намояндагони мақомот баргузор мешудаанд.
Бузургмеҳр Ёров рӯзи 28 сантябри соли ҷорӣ дар пайи эълони азмаш барои ташкили Кумитаи дифоъ аз аъзои боздоштшудаи Ҳизби мамнуи наҳзати исломӣ боздошт гардид. Тибқи иттилои Вазорати умури дохилӣ Ёров дар “қаллобӣ” ва “сохтакорӣ” муттаҳам мешавад.