Мақоми 160-и Тоҷикистон дар рейтинги ФИФА
Мунтахаби футболи Тоҷикистон дар раддабандии нави Федератсияи байналмилалии футбол (ФИФА), ки имрӯз, якуми октябр нашр шуд, бо 156 имтиёз дар ҷойи 160-ум қарор гирифтааст.
Дар қиёс ба моҳи сипаришуда, мунтахаби Тоҷикистон мавқеашро ду зина аз даст додааст. Беҳтарин нишондоди мунтахаби Тоҷикистон дар феҳристи FIFA ҷойи 106-ум дар моҳи июни соли 2013 буд.
Миёни кишварҳои минтақа Узбакистон дар мақоми 74-ум пештоз буда, Қазоқистон дар ҷои 142, Туркманистон – 155 ва Қирғизистон дар зинаи 146-анд.
Дар садри рейтинг тими миллии Аргентина қарор дорад. Дар ҷойи ду Белгия ва дар мақоми се Олмон ҷой гирифтаанд. Португалия, Колумбия, Испания, Бразилия, Уэлс, Чили, Англия шомили даҳгонаи беҳтарин тимҳои миллии ҷаҳон гардидаанд.
Раддабандии ФИФА аз соли 1993 инҷониб ҳар моҳ таҳия мегардад. Имтиёзҳо ба кишварҳо аз рӯи натоиҷи дастаи мунтахаб дода мешавад.