Кумитаи дин: Зоирини тоҷик дар издиҳоми Макка осеб надиданд
Кумитаи дини Тоҷикистон мегӯяд, зоирини тоҷик дар рӯзи 24 сентябр дар издиҳоми водии Минои шаҳри Макка, ки боиси ҳалокати беш аз 700 зоир шудааст, осебе надидаанд.
Тибқи иттилои ин ниҳод 6300 зоири тоҷик, ки имсол Хонаи Худоро зиёрат карданд, маросими ҳаҷро анҷом доданд ва дар назар аст, аз 28-уми сентябр бозгашташон ба Ватан оғоз шавад.
Ин дар ҳолест, ки 24 сентябр дар ҷараёни маросими Ҳаҷ дар Мино издиҳоми зоирин якдигарро зер кардаанд, ки дар натиҷа 717 нафар ҳалок ва қариб 720 нафари дигар захмӣ шудаанд. Тибқи иттилои мақомоти Арабистони Сауд, соли равон ҳудуди 2 миллион зоир аз саросари олам баҳри адои фарзи Ҳаҷ ба Каъба рафтаанд.