Вазорати молия: Маоши президенту вазирон махфист
Раҷаб Одинаев, сардори Раёсати буҷети мақомоти ҳокимият ва идораи давлатии Вазорати молияи Тоҷикистон мегӯяд, маоши вазирон ва президенти Тоҷикистон махфӣ мебошад.
Одинаев имрӯз, 24-уми июл дар суҳбат бо “Озодагон” гуфт, зимни ислоҳоти музди меҳнат дар соли 2005 хизматчиёни давлатӣ тақсимбандӣ шуданд: “Хизматчиёни давлатии сиёсӣ ва мансабдорҳои маъмурӣ. Маоши хизматчиёни давлатии сиёсӣ-маоши вазирону роҳбари давлатро ифшою чоп кардан мумкин нест. Махфӣ аст. Маоши мансабдорҳои маъмурӣ ошкор аст”.
Дар ҳамин ҳол Ҷамшед Каримзода, муовини аввали вазири молияи Тоҷикистон иттилоъ дод, ки аз 1 сентябр музди маоши кормандони буҷавӣ, нафақа ва идрорпулиҳо дар ҳаҷми аз 15 то 25 фоиз боло меравад. Ӯ афзуд, ки вазорат бо мақсади боло бурдани маошу дигар пардохтҳои буҷавӣ 329 миллион сомониро равона хоҳад кард.