Даргузашти шоҳзода ал-Файсал баъд аз 40-солӣ вазирӣ
Шоҳзода Сауд ал-Файсал, вазири пешини умури хориҷии Шоҳигарии Арабистони Саудӣ дар синни 75-солагӣ аз олам даргузаштааст.
Расонаҳои Арабистони Саудӣ такя ба хонадони Оли Сауд хабар додаанд, ки ал-Файсал рӯзи 9 июл даргузаштааст.
Сауд ал-Файсал дар соли 1975 ба ҳайси вазири умури хориҷии Арабистони Саудӣ таъйин шуда, давоми 40 сол ин курсиро дар ихтиёр дошт. Ӯ моҳи апрели соли равон ба сабаби беморӣ аз мақоми вазири умури хориҷии кишвараш барканор шуда, курсиро дар ихтиёри Одил ал-Ҷубайр, сафири пешини Арабистони Саудӣ дар Иёлоти Муттаҳидаи Амрико гузошт.
Ал-Файсал дуюмин фарзанди Файсал ибни Абдулазиз ба шумор рафта, бародарзодаи Салмон ибни Абдулазиз – подшоҳи феълии арабистони Саудӣ мебошад. Ал-Файсал соли 1940 дар шаҳри Тоифи арабистони Саудӣ ба дунё омадааст. Дар гузашта ба ҳайси муовини вазири нафти Саудӣ кор кардааст.