Гиряи футболбозони Сурия ва роҳхати “Истиқлол” ба чорякниҳоии Ҷоми AFC-2015
Тими “Истиқлол”-и Душанбе дар қисмати ҳаштякниҳоии Ҷоми AFC-2015 (Конфедератсияи футболи Осиё) 26 май дар Варзишгоҳи марказии Душанбе дастаи “Ал-Ваҳда”-и Сурияро мағлуб сохта, ба даври баъдии ин сабқат роҳ ёфт.
Вақти асосии бозӣ ҳисоб мусовӣ - 1:1 анҷом ёфт ва вақти иловагӣ ҳам онро тағйир надод. Довар зарбаҳои ҷаримавӣ муқаррар намуд. Бозигарони “Истиқлол” аз пеналтӣ чор тӯбро ба нишон расонданд, аммо “Ал-Ваҳда” ҳамагӣ ду гол зад. Дар пайи ба нишон нарасидани зарбаҳои 11 метрӣ бархе аз футболбозони дастаи Сурия ашк рехтанд.
Тими “Истиқлол”, ки дар даври интихобии AFC-2015 ҳамроҳ бо “Ал-Қодсия”-и Кувайт, "Эрбил"-и Ироқ ва “Аҳал”-и Туркманистон шомили гуруҳи "С" буд, бо 11 хол дар гуруҳаш мақоми аввалро касб намуда, ба даври ҳаштякниҳоӣ роҳ ёфт.