Иштироки Устопириён дар қатори 16 варзишгари беҳтарин дар “WORLD MASTERS”
Комроншоҳи Устопириён, паҳлавони варзидаи Тоҷикистон ва ғолиби чандин мусобиқоти байналмилалӣ дар мусобиқаи “WORLD MASTERS” кишварро намояндагӣ хоҳад кард.
Ин мусобиқа рӯзҳои 23 ва 24 майи соли равон дар шаҳри Риботи Мағриб баргузор шуда, дар он 16 варзишгари беҳтарини ҷаҳон дар вазнҳои гуногун вориди сабқат мешаванд.
Паҳлавони тоҷик дар вазни 90 кило вориди майдон шуда, ҳоло дар рейтинги ҷаҳонӣ дар раддаи 12-ум бо 930 имтиёз қарор дорад.
Комроншоҳи Устопириён 22 сол дошта, соли 2012 ду маротиба барандаи Ҷоми Аврупо (ҳам миёни ҷавонон ва ҳам бузургсолон), ду маротиба барандаи медали тилои мусобиқаҳои байналмилалӣ ва ҳамчунин барандаи нишони биринҷии Чемпионати Осиё (Тайван моҳи октябр) дар риштаи ҷудо гардидааст. Дар рӯзи дувуми мусобиқаи куштии миллӣ дар ҷашни Наврӯзи 2015 дар шаҳри Хуҷанд шоҳҷоизаи мусобиқаро соҳиб шуд, ки аз ҷониби раисҷумҳури Тоҷикистон тақдим гардид.