Идомаи рекордшиканӣ: Рубл ба пастию доллар ба боло
Қурби рубли русӣ дар Тоҷикистон ба таври бесобиқа поён рафта, имрӯз, 15-уми декабр дар нуқтаҳои мубодилаи асъори Душанбе 1000 рубл аз 92 то 97 сомонӣ арзиш дорад. Ин дар ҳолест, ки қаблан 1000 рубли русӣ ҳудуди 150 сомонӣ арзиш дошт.
Дар баробари уфти рубл доллар ҳамоно майли гаронӣ дорад ва имрӯз, 15-уми декабр саррофони нуқтаҳои мубодилаи асъор дар дафтари марказии “Агроинвестбонк” арзиши фурӯши як долларро 5,58 сомонӣ муайян кардаанд. Дар нуқтаҳои мубодилаи асъори “Корвон”, калонтарин бозори Тоҷикистон ин нишондод 5,55-5,56 сомониро ташкил медиҳад.
Дар маркази Душанбе саррофон қурби долларро дар овезаҳояшон 5,52 сомонӣ нишон додаанд, вале ба баҳонаи набудани доллар аз фурӯши он худдорӣ мекунанд.
Ин дар ҳолест, ки аввали моҳи равон бо дахолати Бонки Миллӣ, ки ҳамарӯза то 4 миллион долларро барои устувор нигоҳ доштани сомонӣ ба бозор мерехт, як доллар ба 5,28-5,30 сомонӣ баробар буд. Аммо зоҳиран захираҳои Бонки асосии Тоҷикистон низ майл ба камӣ доранд, чун танҳо дар давоми қариб се ҳафтаи охир арзиши як доллар ҳудуди 28-30 сомонӣ болотар рафтааст.