“Истиқлол” ва “Регар-ТадАЗ” муддаии Ҷоми Тоҷикистон
Тимҳои футболи “Истиқлол”-и Душанбе ва “Регар-ТадАЗ”-и Турсунзода бори чорум паиҳам дар бозии ниҳоии Ҷоми Тоҷикистон ширкат мекунанд.
Натиҷаи бозиҳои ҷавобии даври ниманиҳоии Ҷоми футболи Тоҷикистон-2014 ба нафъи ин ду даста шуд. “Истиқлол” дар меҳмонӣ бо “Саройкамар”-и Панҷ ҳисобро 1:1 кард. Дар бозии аввали ниманиҳоӣ клуби Душанбе ҳарифашро бо ҳисоби 5:0 шикаст дода буд. “Регар-ТадАЗ” бошад, дар бозии ҷавобии худ “Хайр”-и Ваҳдатро бо ҳисоби 3:1 мағлуб кард. Бозии аввали ин ду даста 0:1 ба фоидаи “Хайр” буд.
Бозии ниҳоӣ 22 ноябр дар Варзишгоҳи марказии шаҳри Душанбе баргузор шуда, ғолиб Ҷоми Тоҷикистон дар соли 2014-ро соҳиб мегардад.
“Истиқлол” се маротиба ва “Регар-ТадАЗ” шаш маротиба Ҷоми Тоҷикистонро ба даст овардаанд.